Грузия Online-ի փոխանցմամբ՝ աշխատանքային այցով Կիևում գտնվող՝ Վրաստանի եվրաատլանտյան ինտեգրման հարցերով փոխվարչապետ Գեորգի Բարամիձեն հայտարարել է, որ ՆԱՏՕ-ին Վրաստանի անդամակցելը դրականորեն կազդի Ռուսաստանի հետ հարաբերությունների վրա.
«Վրաստանը դեռևս իրատեսական հեռանկարներ չունի Աբխազիայի և Հարավային Օսիայի ապաօկուպացման համար։ Սակայն այդ հնարավորություններն ի հայտ կգան այն դեպքում, եթե Վրաստանն անդամակցի ՆԱՏՕ-ին։
Երբ Վրաստանն անդամակցի ՆԱՏՕ-ին,- իսկ դա անպայմանորեն տեղի է ունենալու,- այդ ժամանակ էլ ի հայտ կգան նոր հնարավորություններ, նոր հեռանկարներ Ռուսաստանի հետ հարաբերությունները կարգավորելու համար։ Դժբախտաբար, այսօր մենք ռեալ հեռանկարներ չունենք այդ տարածքների ապաօկուպացման համար՝ չնայած գործնականում բոլոր ոլորտներում մենք ընդհանուր շահեր ունենք Ռուսաստանի հետ։
Մենք վստահ ենք, որ Վրաստանը Ռուսաստանի հետ ունենալու է ներդաշնակ հարաբերություններ, ինչպես որ իր մյուս հարևանների պարագայում է։ Դա բխում է մեր ժողովուրդների օբյեկտիվ շահերից»։
Հիշեցնենք, որ այս շաբաթ Վրաստան է ժամանում ՆԱՏՕ-ի գլխավոր քարտուղար Անդերս Ֆոգ Ռասմուսենը։
