Լոնդոնում տեղի ունեցած «Միսս աշխարհ 2011» գեղեցկության միջազգային մրցույթում հաղթող է ճանաչվել Վենեսուելայի 22-ամյա ներկայացուցիչ Իվիան Սարկոսը: Ինչպես հաղորդում է Agence France Press-ը, երկրրորդ և երրորդ տեղերը զբաղեցրել են համապատասխանաբար՝ Ֆիլիպինների և Պուերտո Ռիկոյի ներկայացուցիչները:
Մրցույթին մասնակցել են 113 երկրների ներկայացուցիչներ: Նախնական գնահատականներով` Լոնդոնից ուղիղ հեռարձակմամբ միջոցառմանը հետևել է ավելի քան մեկ միլրադ հանդիսատես աշխարհի 150 երկրներից:
Սարկոսի շնորհիվ Վենեսուելան դարձել է աշխարհի միակ երկիրը, որի ներկայացուցիչները 6 անգամ հաղթել են «Միսս տիեզերք» և նույնքան անգամ՝ «Միսս աշխարհ» մրցույթներում:
Գործակալությունը նշում է, որ չնայած երիտասարդ տարիքին` Իվիան Սարկոսը մեծ տառապանքների միջով է անցել և հաջողության է հասել ոչ միայն արտաքին տեսքի, այլև համառ աշխատանքի շնորհիվ:
Իվիանը մեծացել է բազմանդամ ընտանիքում: Դժբախտ պատահարի հետևանքով 8 տարեկանում նա զրկվել է ծնողներից և 12 եղբայրների հետ որբ է մեծացել: Նա ապրել է մենաստանի մանկական որբանոցում և նույնիսկ առաջարկ է ստացել միանձնուհի դառնալու, սակայն երկար մտածելուց հետո հրաժարվել է այդ առաջարկից:
Այժմ Իվիան Սարկոսը զբաղվում է բարեգործությամբ. Ամասոնաս նահանգում նա օգնում է հնդկացի երեխաներին, Կարակասում այցելում մանկատներ, հիվանդանոցներ: Նա ստեղծել է բարեգործական հիմնադրամ՝ «Գեղեցկությունը ծառայում է մաւրդկանց», որը կոչված է օգնելու աղքատ վենեսուելացիներին:
Հիշեցնենք, 2010 թ. «Միսս աշխարհ» մրցույթի հաղթող էր ճանաչվել ԱՄՆ ներկայացուցիչը, իսկ Վենեսուելան զբաղեցրել էր երրորդ հորիզոնականը: