«Խոսքի իրավունք» միավորումը տեղեկացնում է, որ դեկտեմբերի վերջին կանցկացնի մրցանակաբաշխություն։
Միավորման տարածած մամլո հաղորդագրության համաձայն՝ համացանցի դերը մարդկանց կյանքում օրեցօր աճում է, մինչդեռ Հայաստանում այն հասանելի է միայն բնակչության մոտ 10 %-ին: Այն կարող է ծառայել որպես թերթ, գիրք, հեռահաղորդակցության միջոց, հանրագիտարան, զվարճանքի միջոց և այլն:
«Խոսքի իրավունք» միավորումը ցանկանում է աջակցել նրանց, ովքեր, բիզնեսից բացի, համացանցում իրականացնում են սոցիալական նշանակության նախագծեր:
Մրցանակակիրներ կարող են դառնալ կայքերը, քաղաքացիական նախաձեռնությունները և խմբերը, լրագրողները և այլն:
Մրցանակները կհանձնվեն հետևյալ անվանակարգերում. «Լավագույն քաղաքացիական նախաձեռնություն», «Լավագույն հայրենասիրական խումբ», «Լավագույն խումբը Facebook -ում», «Լավագույն մանկական կայք», «Լավագույն երգիծական նախագիծ»:
Ինչպես նշում է «Խոսքի իրավունք» միավորումը, սրանք միայն նախնական անվանակարգերն են, դրանք վերջնականապես պատրաստ կլինեն մեկ ամսից: Մասնակցության հայտ ներկայացնելու համար անհրաժեշտ է դիմել միավորմանը՝ [email protected] հասցեով:
Միավորումը տեղեկացնում է նաև, որ պատրաստ է համագործակցության հարցեր քննարկել տարբեր կազմակերպությունների ներկայացուցիչների հետ:
