«Մենք չենք կարող համարել, որ Հայաստանում քաղաքացին բավարար մակարդակով է պաշտպանված: Եթե դուրս գանք փողոց և հարցնենք՝ քաղաքացին իրեն պաշտպանվա՞ծ է զգում թե՛ պետական կառույցների, թե՛ բյուրոկրատիայի, թե՛ մնացած հարցերում, իհարկե համոզված եմ՝ 10 հոգուց 9-ը կասի, որ պաշտպանված չի զգում: Այսօր իրավիճակը չես կարող համեմատել 5 տարի առաջվա իրավիճակի հետ, ինչ-որ բան արվում է: Համարում եմ, որ 1995 թ. Սահմանադրությունից հետո մեր երկիրը տարվեց միակենտրոն, ազատ կամքը ճնշելու ճանապարհով: Հասարակության հետ դեֆորմացիաներ տեղի ունեցան»,-նշում է Հայաստանում մարդու իրավունքների պաշտպան Արմեն Հարությունյանը:
Նա վստահ է, որ այսօր երկրում կարգ ու կանոն, մարդկանց պաշտպանվածության հստակ քայլեր արվում են, և զարգացման տենդենցը հուսադրող է: «Այս տարի մարդու իրավունքների գրասենյակը ստացել է մարդու իրավունքների խախտման մոտ 5000 բողոք: Հիմնական ոլորտներն են դատական համակարգը, քաղաքապետարանը, ոստիկանությունը, որովհետև հասարակության հետ շփման եզրերը այս կառույցների հետ շատ ավելի մեծ են»,- եզրափակեց Արմեն Հարությունյանը: