Հայ ազգային կոնգրեսը նոյեմբերի 3-ին հաղորդագրություն էր տարածել այն մասին, որ Կոնգրեսի առաջնորդ Լևոն Տեր-Պետրոսյանը հանդիպում էր ունեցել Վերակառուցման և զարգացման եվրոպական բանկի պատվիրակության հետ, որը գլխավորել է ՎԶԵԲ փոխնախագահ Յան Ֆիշերը: Հանդիպման ընթացքում քննարկվել են Հայաստանի տնտեսական զարգացման, տնտեսական հեռանկարի և առկա իրողությունների վերաբերյալ հարցեր: Այդ հանդիպումը բավական ուշագրավ է՝ նկատի ունենալով, որ կարծես թե այն աննախադեպ է: Դժվար է հիշել մի դեպք, երբ միջազգային տնտեսական կառույցի պատվիրակություն հանդիպի քաղաքական ընդդիմության առաջնորդի հետ: Լևոն Տեր-Պետրոսյանի հետ վերջին երեք-չորս տարիներին հանդիպել են միջազգային բազմաթիվ պատվիրակություններ, որոնք, սակայն, եղել են բացառապես քաղաքական, դիվանագիտական գործառույթներ իրականացնող: Իսկ ՎԶԵԲ-ը տնտեսական կառույց է, և այդ իմաստով աննախադեպ է Լևոն Տեր-Պետրոսյանի հետ հանդիպումը ու նաև հենց այդ տեսանկյունից՝ շատ հետաքրքրական:
Հասկանալի է, որ համաշխարհային տնտեսական և ֆինանսական կառույցները նաև քաղաքական դերակատարում են ունենում ժամանակակից աշխարհում, այսինքն՝ ծառայում են որպես քաղաքական գործիքներ: Հենց այդ տեսանկյունից է իրադարձությունը հետաքրքրական, քանի որ հարց է առաջանում, թե առաջիկայում ինչ ծրագրեր են առաջ մղվելու այդ գործիքի միջոցով: Ավելին, հարց է առաջանում նաև՝ արդյո՞ք առաջիկայում Տեր-Պետրոսյանի հետ հանդիպելու ցանկություն կարտահայտեն նաև այլ ֆինանսա-տնտեսական միջազգային կառույցներ, որոնք մեծ հեղինակություն ունեն աշխարհում և նույնպես հանդիսանում են ոչ միայն զուտ տնտեսական գործառույթ իրականացնող օրգաններ, այլ նաև քաղաքական գործընթացներում պրակտիկ, գուցե ոչ բացահայտ, բայց անմիջական կիրառում ունեցող գործիքներ: Խոսքը, օրինակ, Արժույթի միջազգային հիմնադրամի կամ Համաշխարհային բանկի մասին է: Արդյո՞ք այդ ամենը կապ ունի Հայաստանում ավելի ու ավելի լայն թափ հավաքող նախընտրական իրողությունների հետ, թե պարզապես մեզ համար աննկատ թափ են հավաքում համաշխարհային տնտեսական ճգնաժամն ու դրա հետ կապված ռիսկերը Հայաստանում, որոնք հանրությունը չի նկատում ներքաղաքական և ներիշխանական գործընթացներով տարված լինելու պատճառով, բայց որոնք հանրությանը սպառնում են շատ ավելի լուրջ պետական մարտահրավերներով: Համենայնդեպս բավական հետաքրքրական հարցեր են առաջանում Տեր-Պետրոսյանի և ՎԶԵԲ պատվիրակության հանդիպումից:
Ըստ երևույթին Հայաստանի տնտեսա-քաղաքական կյանքում մոտ ապագայում կարող է զարգացումների մի նոր շերտ բացվել, կամ, համենայնդեպս, կա այդպիսի տրամադրություն և մտադրություն, ինչի առիթով փորձ է արվում համակողմանիորեն շոշափել դաշտը: Դա թերևս վկայում է նաև այն մասին, որ այդ շերտը ունենալու է շատ լուրջ առաքելություն, ինչի համար էլ միջազգային ֆինանսա-տնտեսական հեղինակավոր կառույցը ոչ թե բավարարվում է միայն իշխանության հետ ավանդական շփումներով, այլև փորձում է իրականությունն ամբողջական և առավել հանգամանալից պարզել՝ անմիջականորեն շփվելով նաև ընդդիմության հետ, այն էլ՝ առաջնորդի մակարդակով: