Այսօր մարդու իրավունքների պաշտպանության միջազգային օրն է: Որքանո՞վ է մարդու իրավունքների պաշտպանությունը կարևոր տնտեսության և տնտեսական զարգացման համար: Կարո՞ղ է արդյոք երկիրը տնտեսական աճ ու զարգացում ունենալ այն պայմաններում, երբ խախտվում են մարդու հիմնարար իրավունքները: Այս հարցը «Առաջին լրատվականն» ուղղել է ԱԺ պատգամավոր Արծվիկ Մինասյանին: «Բնականաբար, մարդու իրավունքների ու դրանց պաշտպանության անհրաժեշտությունը յուրաքանչյուր երկրում ուղղակիորեն կապված է տնտեսության զարգացման և տնտեսական ազատության դրսևորման հետ: Սա ամրագրված է ոչ միայն միջազգային փաստաթղթերում, այլև ՀՀ մայր օրենքում` Սահմանադրությունում: Ընդ որում, տնտեսական ազատության և ձեռնարկատիրական գործունեության իրավունքը կապվում է ոչ թե քաղաքացիության, այլ մարդու իրավունքի հիմնարար ազատության հետ: Եվ անկախ նրանից` ՀՀ-ում գտնվող անձը ՀՀ -ի, թե այլ երկրի քաղաքացի է, ունի այդպիսի իրավունք` տնտեսական ազատ գործունեություն ծավալելու: Մյուս կողմից, եթե հետևենք միջազգային համաձայնագրերին, որոնց ՀՀ-ն միացել է, կտեսնենք, որ գերազանցապես նույն ռեժիմն է կիրառվում ինչպես ՀՀ քաղաքացու, այնպես էլ օտարերկրացու նկատմամբ»,- ասաց Ա. Մինասյանը:
