«Հանրապետական» կուսակցությունը լուրջ է վերաբերվում գալիք ընտրություններին և հաջողությունների հասնելու համար կենտրոնացնելու է իր կադրային, կազմակերպչական և ֆինանսական բոլոր ռեսուրսները: «Առաջին լրատվական»-ի հետ զրույցում նման տեսակետ հայտնեց սոցիոլոգ Ահարոն Ադիբեկյանը` անդրադառնալով ԱԺ նախագահ Հովիկ Աբրահամյանի և նախագահի աշխատակազմի ղեկավարի տեղակալ Միքայել Մինասյանի հրաժարականներին և ՀՀԿ նախընտրական շտաբը ղեկավարելու մասին նրանց հայտարարություններին:
«Քաղաքական նախկին փորձը ցույց է տալիս, որ կուսակցությունների շտաբների ղեկավարումը պատրաստվածության լուրջ մակարդակ, կապեր և մարդկանց հետ աշխատելու կարողություն է պահանջում: Մենք հիշում ենք, որ Հայաստանի առաջին նախագահ Լևոն Տեր-Պետրոսյանի վերջին շտաբի պետը եղել է Հուսիկ Լազարյանը, Ռոբերտ Քոչարյանի շտաբի պետը եղել է Սերժ Սարգսյանը, այժմ էլ Սերժ Սարգսյանի շտաբի պետ է նշանակվում Հովիկ Աբրահամյանը: Բոլոր ժամանակներում այս գործը ստանձնել են լուրջ մարդիկ, ովքեր տեղում կարողացել են խնդիրներ լուծել, իրավիճակին արագ արձագանքել: Կարևոր է, որ կուսակցության շտաբի պետն ու նրա տեղակալը լինեն մարդիկ, ովքեր կարող են արագ և ինքնուրույն որոշումներ կայացնել: Այնտեղ չի կարող լինել մեկը, ով պետք է դեռ մեկին էլ զանգահարի, ինչ-որ բան հարցնի կամ իր գործողությունների համաձայնություն ստանա: Դրա համար էլ շտաբի պետերը միշտ եղել են վստահելի և փորձառու անձինք: Իսկ Հովիկ Աբրահամյանն ու Միքայել Մինասյանը հենց այդ մարդիկ են, ովքեր փորձառու են, կապեր ունեն տեղական կառույցների հետ, նախկինում էլ այդ գործն են արել: Հովիկ Աբրահամյանը նախկինում էլ շտաբի պետ է եղել, Միքայել Մինասյանն էլ օգնել է նրան»,- հիշեցրեց սոցիոլոգը:
Հիշեցնենք, որ ԱԺ նախագահ Հովիկ Աբրահամյանի հրաժարականի մասին հայտնի է դարձել նոյեմբերի 1-ին: Նա իր հրաժարականը կներկայացնի խորհրդարանի նոյեմբերի 14-ի նիստում: ԱԺ նախագահը հայտարարել էր, որ գլխավորելու է ՀՀԿ շտաբը:
Իսկ ահա նախագահի աշխատակազմի ղեկավարի տեղակալ Միքայել Մինասյանը իր դիմումի համաձայն զբաղեցրած պաշտոնից ազատվել էր երեկ` նոյեմբերի 3-ին: Նա նշել էր, որ գնում է «օգնելու Հովիկ Աբրահամյանին գալիք ընտրությունները պատշաճ նախապատրաստելու հարցում» և կարծում է, որ դա է այսօրվա առաջնահերթությունը: