Ինչպես «Առաջին լրատվական»–ին տեղեկացրեցին կառավարության հասարակայնության հետ կապերի բաժնից, ՀՀ փոխվարչապետ, տարածքային կառավարման նախարար Արմեն Գևորգյանը Լեհաստանի Պոզնան քաղաքում այսօր մասնակցել է Պրահյան գործընթացի «Միգրացիոն գործընկերության կառուցում» նախարարական երկրորդ համաժողովին: Նշենք, որ Պրահյան գործընթացի անդամ են Եվրամիության, Հարավարևելյան և Արևելյան Եվրոպայի, Կենտրոնական Ասիայի երկրները: Գործընթացը մեկնարկել է 2009 թ. Պրահայում և ուղղված է անդամ-պետությունների միջև միգրացիոն ոլորտում գործընկերության խորացմանը:
Համաժողովի լիագումար նիստերում քննարկվել է երեք հիմնական թեմա` «Անօրինական միգրացիայի դեմ պայքարն ու նախազգուշացումը», «Օրինական միգրացիան և շարժունակությունը` աշխատանքիային միգրացիայի շեշտադրմամբ» և «Միգրացիան ու շարժունակությունը որպես զարգացման դրական ուժ»:
ՀՀ փոխվարչապետ Ա. Գևորգյանը Շվեդիայի միգրացիայի և ապաստանի քաղաքականության նախարար Թ. Բիլսթրոմի հետ վարել է համաժողովի լիագումար նիստի «Ապաստանի տրամադրման և միջազգային պաշտպանության ոլորտում ներուժի ամրապնդումը» թեմայով քննարկումը, որի ժամանակ հանդես է եկել նաև ելույթով:
Համաժողովի արդյունքներով՝ հավանության է արժանացել Պրահյան գործընթացի 2012-2016 թթ. գործողության ծրագիրը:
