Մեր կյանքում բազմաթիվ են նեգատիվ երևույթները, բայց եկեղեցու դիրքորոշումը չկա: «Առաջին լրատվական»-ի հետ զրույցում նման տեսակետ հայտնեց ազգագրագետ Հրանուշ Խառատյանը`խոսելով Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի գահակալության 12 տարիների ձեռքբերումների և բացթողումների մասին: Ազգագրագետը նկատեց և՛ ձեռքբերումներ, և՛ բացթողումներ:
«Ձեռքբերում կարելի է համարել այն, որ որոշ չափով եկեղեցին ֆիզիկապես մոտեցավ բնակչությանը. այսինքն՝ հին եկեղեցիները վերակառուցվեցին և կառուցվեցին նոր եկեղեցիներ, որի հետևանքով ակտիվացավ նաև բնակչության հետ շփումը, մասնավորապես՝ երիտասարդական թեմերի գործունեությունը»,- նշեց Հրանուշ Խառատյանը:
Անդրադառնալով բացթողումներին՝ նա ասաց, որ լուրջ խնդիրներ ունենք եկեղեցու սոցիալականացման ոլորտում: Նա վստահ չէ, որ այստեղ ընդհանրապես ծրագիր կա: «Ակնհայտ է, որ եկեղեցին սոցիալական դոկտրին չունի, այս պահին չի կարող մեր կաթողիկոսարանը բացառապես կրոնական լինել և գործունեությունը բացառապես կրոնական չէ»,- ասաց ազգագրագետը: Նրա համոզմամբ` չկա մի կոնցեպցիա, որով եկեղեցին ցույց տա, թե ինչքանով է հետաքրքրված հասարակության կյանքով. երիտասարդներին կրթել, կրոնական գիտելիք տալ, կրոնը հենարան դարձնել մեր կյանքի համար: «Մեր կյանքում բազմաթիվ են նեգատիվ երևույթները, բայց եկեղեցու դիրքորոշումը չկա»,- ընդգծեց Հրանուշ Խառատյանը:
Անդրադառնալով եկեղեցաշինությանը`նա ասաց, որ ունենք բազմաթիվ տեղեր, որտեղ երևի պետք են եկեղեցիներ, բայց չկա այն քարտեզը, որ Հայ Առաքելական եկեղեցու կաթողիկոսարանը Հայաստանի տարածքում նկատի ունի որպես իր եկեղեցաշինության ծրագիր: Ըստ ազգագրագետի`եկեղեցի կառուցվում է կամ կկառուցվի այնտեղ, որտեղ այս կամ այն ֆինանսական մագնատը ցանկություն է հայտնում կառուցել. սա էլ հանգեցնում է նրան, որ ունենում ենք կուտակումներ մի տեղ, իսկ մյուս տեղում ունենում ենք եկեղեցիների պակաս: Նրա հավաստմամբ` պետք է լինի քարտեզ. այդ ծրագրի գիտակցումը աստիճանաբար կամրապնդվի հասարակական գիտակցության մեջ, ապա շինարարության ֆինանսավորումը նույնպես կընդգրկվի այդ տրամաբանության մեջ: «Վերջին հաշվով, եկեղեցի կառուցելը ինքնանպատակ չէ և գործառույթ ունի, որը կապված է մարդկանց հետ»,- ամփոփեց ազգագրագետ Հրանուշ Խառատյանը:
Նշենք, որ այսօր Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի գահակալության 12-րդ տարեդարձի և ծննդյան 60-ամյակի առիթով տեղի է ունեցել Հայրապետական մաղթանքի արարողություն: