Ստեփանակերտի ռազմական ոստիկանության մեկուսարանում Աշոտ Կոստանդելյանի նկատմամբ բռնություններ են գործադրել, որ նա մարտի 17-ին, Ասկերանում մահացած զինծառայող Ահարոն Հայրապետյանի սպանությունը վերցնի իր վրա: Այս մասին ասաց փաստաբան Ստեփան Ոսկանյանը, ով ստանձնել է Աշոտ Կոստանդելյանի պաշտպանությունը: Վերջինս 4 անգամ ցուցմունք է փոխել: Սկզբնական ցուցմունքում նա ընդունել է, որ անզգույշ կրակոցով մահ է պատճառել իր ծառայակցին, այնուհետև 2 անգամ պնդել է, որ այդ խոստովանական ցուցմունքը տվել է ծեծի ազդեցության ներքո:
«Առանձնատեսակցությունից հետո Աշոտի մոտ են մտնում նրա ծնողները և դուրս գալու ժամանակ հայտնում են, որ Աշոտը մեզ տարբեր ձևերով փորձում էր հասկացնել, որ ինքը կապ չունի այդ սպանության հետ և ստիպված է այդ ցուցմունքները տվել: Նույն օրը փորձում եմ ևս մեկ անգամ մտնել Աշոտի մոտ, սակայն թույլ չեն տալիս` նշելով, որ պահանջագիրը, որով ես պետք է ներս մտնեմ, չունի կնիք:
Միայն Շուշիի բանտում ես պարզեցի, որ պահանջագիրը, որով ես պետք է ներս մտնեմ, պիտի ունենա փաստաբանի կնիք»,- ասաց Ստեփան Ոսկանյանը: Նրա խոսքով, մեղադրանքը հիմնված է հենց Աշոտի ցուցմունքի վրա, բացի այդ ապացույցից ուրիշ ապացույց գոյություն չունի: Իսկ Աշոտին որպես մեղադրյալ ներգրավելը պայմանավորված է եղել այն հանգամանքով, որ Ահարոն Հայրապետյանի մահվան պահին միայն Աշոտն է եղել նրա մոտ:
Փաստաբանի փոխանցմամբ` «Մինչ վարույթն իրականացնող քննչական աշխատակիցների ժամանելը, բարձրաստիճան սպաները եկել են ստուգել զենքերը և պարզել են, որ որևէ զենքից կրակված չի եղել /տեղում գտնվող/»: Այդ և այլ հանագամանքներ հաշվի առնելով էլ, պաշտպանական կողմը գտել է, Աշոտին մեղադրանք առաջադրելը ճիշտ չէ, և տարբեր ատյաններ դիմում-բողոքներ է ուղարկել: Դրանից հետո, քննչական բաժնի պետն օգտագործելով իր լծակները (հոգեբանական, գուցե նաև` ֆիզիկական ճնշումներ գործադրելով), որպեսզի նա պնդի իր մեղքը հաստատող ցուցմունք, որ իր արձակած կրակոցից է մահացել զինծառայողը:
Ըստ փաստաբանի` եթե չլիներ Աշոտի ցուցմունքը, միակ վարկածը պաշտոնականն էր մնալու` մահացել է հակառակորդի կողմից արձակված գնդակից, միայն թե բոլորը պնդում էին, որ կրակոցը եղել է մոտ տարածությունից:
