Ադրբեջանական ANS PRESS-ին տված հարցազրույցում Ադրբեջանում ԱՄՆ դեսպան Մեթյու Բրայզան մեկնաբանել է հոկտեմբերի 25-ին Թուրքիայի Իզմիր քաղաքում թուրք-ադրբեջանական գազային համաձայնագրերի փաթեթի կնքումը.
«Ես մեծ հույսեր եմ կապում այն ապագա նավթագազային նախագծերի հետ, որոնք Թուրքիան ու Ադրբեջանը պլանավորել են համատեղ կյանքի կոչել։ Ես իմ կյանքի 5 տարիները նվիրաբերել եմ այդ համաձայնագրի կնքմանը և ներկայումս չափազանց գոհ եմ ձեռք բերված արդյունքից։
Այդ համաձայնագիրը ճանապարհ է հարթում «Հարավային գազային միջանցքի» համար և հանդիսանում է դրա զարգացման հերթական քայլը։ Դա նշանակում է, որ Ադրբեջանը Եվրոպային օգնում է գազի ապահովման հարցում։ Դա շատ կարևոր է թե՛ Ադրբեջանի, թե՛ Եվրոպայի համար»։
Հիշեցնենք, որ թուրք-ադրբեջանական վերոնշյալ գազային համաձայնագրով նախատեսված է, որ ադրբեջանական «Շահ Դենիզ» գազային հանքավայրի երկրորդ փուլի մշակման (մեկնարկը 2017 թվականին) արդյունքում ստացված գազից տարեկան 6 միլիարդ խորանարդ մետր վաճառվելու է Թուրքիային, և 10 միլիարդ խորանարդ մետր գազ էլ թուրքական տարածքով տարանցվելու է դեպի Եվրոպա։