Ադրբեջանական Turan լրատվական գործակալության փոխանցմամբ՝ ԱՄՆ հայամետ կոնգրեսական Ադամ Շիֆը նոյեմբերի 3-ին նամակ է ուղարկել Սենատի ենթակոմիտեների ղեկավարներին և Ներկայացուցիչների պալատին, որում դիմել է նրանց՝ կոչ անելու USAID-ին ու պետդեպարտամենտին նվազագույնը 10 միլիոն դոլարի հումանիտար օգնություն ցուցաբերել Լեռնային Ղարաբաղին։
Իր նամակում Շիֆը նշել է. «Հաշվի առնելով Ադրբեջանի շարունակական ռազմաշունչ հռետորիկան՝ այսօր, ավելի քան երբևէ, կարևոր է, որ ԱՄՆ-ը աջակցի Լեռնային Ղարաբաղի ժողովրդի ինքնորոշման իրավունքին։ Այդ օգնությունը կօգնի Լեռնային Ղարաբաղում բնակվող անձանց ոչ միայն հաղթահարել հումանիտար ճգնաժամերը, որոնք առաջացել են Թուրքիայի ու Ադրբեջանի կրկնակի շրջափակման պատճառով, այլև կնպաստի տարածաշրջանում իրավիճակի կայունությանը՝ ի ցույց դնելով հակամարտության խաղաղ կարգավորմանը մեր անփոփոխ հակվածությունը»։