Այսօր լրագրողների հետ հանդիպման ժամանակ ԺԿ նախագահ Տիգրան Կարապետյանն ասաց, որ, իր տեղեկությունների համաձայն, ՀԱԿ-ին խոստացել են 17 մանդատ: « Ես լսել եմ 17 մանդատի մասին, ես դա հավանական եմ համարում, ես այդպիսի տեղեկություններ ունեմ»,- նշեց Տ. Կարապետյանը: Անդրադառնալով ՀԱԿ-ի գործունեությանը՝ ասաց․ խոսել, թե պայքարն ըմբոստ է, անկանխատեսելի է, չի կարելի: Նա նաև ասաց, որ որևէ մեկին չի ասել, թե միանում է ՀԱԿ-ին, այլ ասել է, որ մասնակցելու է հանրահավաքին՝ ժողովրդին ողջունելու համար: Թեև բանախոսին դուր չեն գալիս ՀԱԿ-ի հանրահավաքի շոու պարունակող տարրերը, բայց որպես քաղաքական միավոր կարևորում է ՀԱԿ-ին:
«Ամեն քայլ, բառ համակարգվում է: Դա չի կարող առաջացնել պոռթկում: Իրենք են համակարգում: Սցենար ունեն, ռեժիսոր, իսկ ես կցանկանայի պոռթկում տեսնել»,- ասաց կուսակցության նախագահը`հավելելով, որ կա մի մեծ զանգված, որը չի ընդունում ո՛չ Ս. Սարգսյանին, ո՛չ որոշակի զանգված, որը Լ. Տեր-Պետրոսյանին չի ընդունում. այդ զանգվածի համար ԺԿ-ն կլինի այլընտրանք: Բանախոսը կուսակցության համագործակցությունը ՀՅԴ-ի հետ անհնար է համարում, քանի որ ՀՅԴ-ի գաղափարախոսությունն այլ է` ՀՅԴ-ն կուսակցական կազմակերպություն է և ունի զարգացման իր ուղին և ոճը:
ԺԿ նախագահի կարծիքով` ՀԱԿ-ը պետք է հստակեցնի իր նպատակները: « Գուցե իրենց համար նույնպես հասկանալի չեն այդ նպատակները: Ինձ համար Ս. Սարգսյանը նույնպես հասկանալի չէ. մի բան է հասկանալի՝ նա հետապնդում է բիզնես-գաղափարներ»,- ասաց Տ. Կարապետյանը: Անդրադառնալով Ռ. Քոչարյանի՝ քաղաքականություն վերադառնալու խոսակցություններին`նշեց, որ քաղաքականության մեջ ոչինչ անհնար չէ: Նա հնարավոր է համարում, որ Ռ. Քոչարյանն իր կապերի շնորհիվ կարող է վերադառնալ քաղաքականություն:
