ՀՀ վարչապետ Տիգրան Սարգսյանն այսօր ընդունել է Վերակառուցման և զարգացման եվրոպական բանկի (ՎԶԵԲ) փոխնախագահ Յան Ֆիշերին:
Վերջինս այստեղ է Հայաստանի համար նոր ռազմավարության մշակման գործում Եվրոպական բանկի գործունեության առաջնահերթությունները հստակեցնելու նպատակով:
Վերջինիս խոսքով` ՎԶԵԲ-ը կարևորում է փոքր և միջին ձեռնարկատիրությանն (ՓՄՁ) աջակցության ընդլայնման և մասնավոր հատվածի զարգացման ուղղությամբ ծրագրերի իրականացումը:
Տիգրան Սարգսյանն իր հերթին նշել է ՓՄՁ վարկավորման գործիքների բազմազանության խթանման անհրաժեշտությունը, կարևորել Եվրոպական բանկի կողմից տեխնիկական օժանդակության տրամադրումը:
Կառավարության ղեկավարը հեռանկարային է համարել առողջապահության, կենսաթոշակային, ֆինանսական հատվածի և ապահովագրության բնագավառներում գործակցության զարգացումը:
Խոսելով ենթակառուցվածքների ոլորտում համագործակցության հնարավորությունից` զրուցակիցները քննարկել են ԵՄ-ի ֆինանսավորմամբ ՄԱԶԾ-ի կողմից իրականացվող «Հարավային Կովկասում սահմանների համալիր կառավարում» ծրագիրը:
Արծարծվել է նաև սահմանային անցակետերի վերակառուցման և արդիականացման գործում ՎԶԵԲ-ի մասնակցության հարցը:
Յան Ֆիշերը նշել է, որ բանկը պատրաստ է քննարկել վերոնշյալ ծրագրի իրականացմանն աջակցություն ցուցաբերելու հարցը:
