Բյուջեի եկամուտների 100 մլրդ դրամ հավելումը փոքր թիվ չէ, բայց այդքան էլ անհնար չէ՝ ելնելով նրանից, որ հարկերի հավաքման առումով մեծ խնդիր չի դրվում: Այսօրվա ասուլիսում նման կարծիք հայտնեց տնտեսագետ, 1994-1998 թթ. ԿԲ նախագահ Բագրատ Ասատրյանը` պարզաբանելով, որ եթե ոչինչ չարվի` տարեկան տնտեսական աճը և գնաճը կապահովեն դրա 55-60%-ը:
Ըստ բանախոսի` ակցիզի 30%-ով ավելացումը խելամիտ քայլ է հարկային բեռի ավելացման տեսանկյունից: «Խելամիտ, անհրաժեշտ, վաղուց սպասված քայլեր են»,- ասաց Բ. Ասատրյանը` միաժամանակ նշելով, որ դա էլ դեռ քիչ է, և հարկահավաքության ավելի բարձր մակարդակ կարելի է ապահովել. «Վազող շքեղ մեքենաները չհավաքված հարկեր են, բայց կառավարության առաջարկը լուրջ չէ, դիրքորոշումը պետք է փոխվի, շքեղության հարկը տեղին է լինելու, բայց խնդրին ավելի լայն մոտեցում պետք է տրվի»: Բ. Ասատրյանը նշեց՝ սոցիալական բևեռացման խնդրով առաջինն ենք ԱՊՀ տարածքում, և շքեղության հարկի մասին պետք է լրջորեն մտածել, բայց հարկային բեռը պետք է արդարացի լինի:
«100 մլրդով եկամուտների ավելացումը անհրաժեշտ միջոց էր, դրա արդյունքում միայն հնարավոր կլինի ծախսերի մակարդակը պահել նախորդ տարվա մակարդակին: Սա առաջին հերթին պայմանավորված էր նրանով, որ պաշտոնական դրամաշնորհները քիչ են լինելու, և իշխանությունները պետք է փորձեն գտնել ձևեր, որպեսզի լրացնեն բացը: Բայց մեր տնտեսությունն ունի ավելի մեծ հնարավորություններ: ՀՆԱ-ի ստվերը տեսանելի է՝ 20-25%: Եկամտային ստվերն ավելի մեծ է՝ գերազանցում է 40%-ը»,- նշեց Բ. Ասատրյանը ու հավելեց, որ հարկեր/ՀՆԱ հարաբերակցությունը 27%-ի վրա պետք է լինի, այսինքն՝ ներկայիս մակարդակից մոտ 10%-ով բարձր:
Բանախոսի կարծիքով՝ երկիրը փոխվել է և այլևս «քոչարյանականը չէ»: Նա փաստեց, որ խնդիրները կուտակվել են և պետք է լուծվեն: Կա նաև Վրաստանի գործոնը, որը ՀՀ-ից ետ էր, բայց արդեն հարկեր/ՀՆԱ հարաբերակցությունը մինչև 25%-ի է հասել:
«Իշխանությունները պետք է լուծեն խնդիրները, այլապես մենք ապագայից ենք զրկվում ու հետ մնում»,- ասաց Բ. Ասատրյանը:
