«Տեսակետ» մամուլի ակումբի հյուրն էր Սոցիալ-դեմոկրատական-հնչակյան կուսակցության ղեկավար Լյուդմիլա Սարգսյանը:
Անդրադառնալով պաշտոնանկությունների շարքին՝ Լ. Սարգսյանը նշեց, որ դրանք անսպասելի չէին, որովհետև մի իշխանություն, որը չի առաջնորդվում ազգային, պետական շահերով, պետք է հասներ այս վիճակին. «Ս. Սարգսյանը փորձում է ամրացնել թիկունքը և գոհացնել աշխարհաքաղաքական կենտրոնների հետաքրքրությունները»:
Հավանաբար Կարեն Կարապետյանը չկարողացավ դիմանալ Ս. Սարգսյանի շրջապատի ճնշումներին եւ լինելով ռուսամետ գործիչ` հրաժարական տվեց, նշեց Լ. Սարգսյանը` հավելելով, որ պաշտոնանկությունները կշարունակվեն: Ինչ վերաբերում է Հովիկ Աբրահամյանի պաշտոնանկությանը, նա նշեց, որ նա համարվում էր Ռոբերտ Քոչարյանին մոտ կանգնած գործիչ:
Իսկ Գագիկ Ծառուկյանը կախվածություն ունի այս իշխանությունից, նրան հնարավորություն չեն տալիս անկախ գործել, ավելի ազատ դրսևորվել, բայց պարտադրանքով գործընկերը չի կարող լինել վստահելի գործընկեր՝ նա անհրաժեշտ պահին կարող է թռչել ՀՀԿ-ի գնացքից:
Ինչ վերաբերում է Միքայել Մինասյանի պաշտոնանկությանը, ապա Լ. Սարգսյանը նշեց, որ հին ՀՀԿ-ականների մոտ դժգոհություն է առաջացնում նրա գործունեությունը, և դրանով է պայմանավորված նրա` այս պահի պաշտոնանկությունը: Լ. Սարգսյանը նշեց, որ Ս. Սարգսյանի մոսկովյան այցելության ընթացքում հավանաբար նրան նաև հուշել են, որ արեւմտամետ փեսայից պետք է ազատվել:
Բոլոր այն քաղաքական գործիչները, ովքեր նպաստել են ընտրակեղծիքներին` նպաստել են Ս. Սարգսյանի ընտրմանը:
«Առաջին լրատվականի» հարցին՝ եթե Գ. Ծառուկյանը որոշի ազատ գործել, ո՞ւմ կնախընտրի միանալ` Ռոբերտ Քոչարյանի՞ն, թե՞ ՀԱԿ-ին, տիկին Սարգսյանը նշեց, որ նա է որոշում կայացնողը, եւ եթե Ռ. Քոչարյանին միանա` կստանձնի «Մարտի 1»-ի պատասխանատվությունը:
«Առաջին լրատվականի» հարցին` Գագիկ Ծառուկյանը «Մարտի 1»-ի պատասխանատու չէ՞, տիկին Սարգսյանը հիշեցրեց, որ 2008թ. նախագահական ընտրություններին իր կուսակիցների վրա են հարձակվել Գագիկ Ծառուկյանի թիկնապահները: