Թուրքական Akşam թերթի փոխանցմամբ՝ Թուրքիայի արտգործնախարար Ահմեդ Դավութօղլուն հանդիպել է Հյուսիսային Իրաքի քրդական ինքնավարության ղեկավար Մասուդ Բարզանիի հետ։ Հանդիպումից հետո Դավութօղլուն և Բարզանին համատեղ մամլո ասուլիս են տվել։
Դավութօղլուն լրագրողներին հայտարարել է. «Մենք Հյուսիսային Իրաքի քրդական ինքնավարության ղեկավարությունից սպասում ենք հստակ դիրքորոշում ահաբեկչության (Քրդստանի աշխատավորական կուսակցություն, PKK) դեմ համատեղ պայքարում, ակտիվ աջակցություն ու համերաշխություն դրանում։
Վերջին շրջանում մեծ զարգացում են ապրել Թուրքիայի և Հյուսիսային Իրաքի քրդական ինքնավարության կապերը։ 2009 թվականին ես, իսկ այս տարի՝ վարչապետ Էրդողանն այցելել Էրբիլ։ Անթույլատրելի է, որ PKK-ն մեծ վնաս հասցնի մեր երկկողմանի կապերին»։
Բարզանին իր հերթին նկատել է, որ մեծ նշանակություն է տալիս Թուրքիայի հետ հարաբերություններին։
Հիշեցնենք, որ հոկտեմբերին Դավութօղլուն հայտարարել էր, թե իրենք չեն հանդուրժի, որ PKK-ն Հյուսիսային Իրաքից սպառնա Թուրքիային։