Ինչպես տեղեկացրել էինք, շուկայում իրացվող այծի կաթի մեջ հայտնաբերվել են աղիքային ցուպիկի խմբի մանրէներ և ստաֆիլակոկի բակտերիաներ:
Թեմայի շուրջ այսօր լրագրողների հետ հանդիպեցին գյուղատնտեսության նախարարության սննդամթերքի անվտանգության պետական ծառայության տեղեկատվության և հասարակայնության հետ կապերի բաժնի պետ Բաբկեն Պիպոյանը եւ «Սպառողների միություն» ՀԿ նախագահ Արմեն Պողոսյանը:
Բաբկեն Պիպոյանը նկատեց, որ քաղաքացին է ներկայացրել դիմում-բողոք և զանգվածի բաց ու փակ նմուշներ: Սպառողը դառնահամ է զգացել և հասկացել է, որ ինչ-որ բան այն չէ: «Լաբորատոր ստուգման պատասխանը եկավ հաջորդ օրը, և շատ արագ կասեցվեց իրացումը, ինչպես նաև պահանջվեց, որ ապրանքը խանութներից հետ կանչվի: Արդյունքում վարչական վարույթ է հարուցված: Սպառողը այն ձեռք է բերել «Երևան Սիթի» խանութների ցանցից, սակայն ներկա պահին ամբողջ ապրանքը այնտեղից դուրս է բերվել»,- ավելացրեց Պիպոյանը:
Միաժամանակ նկատեց, որ դեռևս ապացույցներ չունեն, թե արդյոք մյուս արտադրատեսակները, օրինակ՝ թթվասերը, մածունը, նույնպե՞ս պարունակում են աղիքային ցուպիկի խմբի մանրէներ և ստաֆիլակոկի բակտերիաներ, թե՞ ոչ: Ինչ վերաբերում է այն հարցին, թե այս մանրէները ինչ վտանգ են իրենցից ներկայացնում, նշեց, որ մեծերի մոտ այն կարող է բերել աղիքային խանգարումներ, իսկ փոքրերի մոտ ավելի ծանր հետևանքներ: Տուժածներ, բարեբախտաբար, չկան: Սակայն տուգանքը հարյուրից երեք հարյուր հազար դրամ է:
Իսկ Արմեն Պողոսյանը ավելացրեց, որ երբ Ֆրանսիայի սպառողների միության նախագահին հարցրել են, թե ինչ կանեք Դուք, եթե սննդում հայտնվի օտար մարմին, նա պատասխանել է՝ իրենք ոչինչ չեն անի, քանի որ դրանով կզբաղվի դատարանը: «Ես կարծում եմ, որ սա այդ դեպքերից է»,- ավելացրեց Արմեն Պողոսյանը եւ նկատեց, որ ստուգումները չպետք է սահմանափակվեն միայն խանութներով, այլ նաև ստուգումներ պետք է իրականացվեն արտադրություններում: