Աշխարհի զարգացումները ՀՀ-ի վրա իրենց ազդեցությունն են թողնում, և ներկայիս գործընթացներից անհանգստությունները բավականին մեծանում են: Ինչպես այսօր ասուլիսում նշեց տնտեսագետ, 1994-1998 թթ. ԿԲ նախագահ Բագրատ Ասատրյանը, բոլոր զարգացած երկրները վերանայել են տնտեսական աճի վերաբերյալ իրենց սպասումները, ակնհայտ է, որ 2012 թ. համաշխարհային տնտեսության զարգացման համար լինելու է բարդ տարի: ՀՀ-ն նայելու է հիմնականում դեպի Ռուսաստան, որի զարգացումներն անմիջական ազդեցություն են ունենում ՀՀ-ի վրա: ՌԴ տնտեսական աճի ցուցանիշները նույնպես մի քիչ իջեցվել են, բայց եթե Ռուսաստանում վիճակը կայուն լինի, տրանսֆերտների տատանումներ չպետք է սպասել, և, ըստ Բ. Ասատրյանի, ֆինանսական հոսքերի կայուն աճ է կլինի, և 2012-ին տրանսֆերտների մակարդակը կհասնի նախաճգնաժամային մակարդակի:
Բանախոսը հիշեցրեց, որ տարեսկզբին տարվա տնտեսական աճը կանխատեսել էր 4-5% և բարձր գնաճ, ինչն իրականանում է: Նրա կարծիքով՝ ավելի շատ միջոցներ պետք է ուղղվեն սոցիալական խնդիրների լուծմանը:
«Կառավարությունը դեռ մինչև վերջ չի բացել խաղաքարտերը: Հարկային փաթեթն է դրված, բայց փաստաթուղթը հրապարակում չկա, օրենսդրական փաթեթի քննարկումները ԱԺ-ն չի սկսել»,- ասաց Բ. Ասատրյանը:
Կառավարությունը հաջորդ տարվա համար ծրագրում է գնաճի կայունացում` մոտ 4%, և տնտեսական աճ` 4-4.2%: Ըստ Բ. Ասատրյանի` աճի առանցքը պետք է կազմի արդյունաբերության աճը, իշխանությունները ծրագրում են բեկում մտցնել, շինարարության անկումը կանխել և 2-2.5% աճ ապահովել:
