Ներկայացնելով հանգստի, սպորտի, մշակույթի ոլորտների բյուջեն` ֆինանսների փոխնախարար Պավել Սաֆարյանը տեղեկացրեց, որ այս ոլորտների համար նախատեսված է 21.3 մլրդ:
Սպորտային միջոցառումների համար 2012-ի բյուջեով նախատեսված է 1մլրդ 44մլն դրամ, ինչը, ի տարբերություն 2011-ի բյուջեի, նվազել է 3.8 տոկոսով: Նվազումը, ըստՍաֆարյանի, պայմանավորված է այն միջոցառումներով, որոնք նախատեսված էին 2011-ին, սակայն 2012-ին չեն լինելու:
«Ժառանգություն» խմբակցության պատգամավոր Անահիտ Բախշյանի հարցին՝ արդյոք սպորտի և երիտասարդության նախարարությունը առաջարկ ներկայացրե՞լ է հաշմանդամների համար սպորտային միջոցառումներ իրականացնելու վերաբերյալ, Սաֆարյանը պատասխանեց՝ նման առաջարկ չի եղել, ինչին սպորտի և երիտասարդության նախարար Արթուր Պետրոսյանը արձագանքեց՝ առաջարկ եղել է, և այն մերժվել է:
Երիտասարդական ծրագրերի համար նախատեսված է 563 մլն դրամ, ինչը 2011-ի համեմատ աճել է՝ պայմանավորված «Երիտասարդ ընտանիքներին՝ մատչելի բնակարան» ծրագրի իրականացմամբ:
Սաֆարյանը նաև տեղեկացրեց, որ վարկային ծրագրով 3մլրդ դրամ նախատեսված է Ալ․ Սպենդիարյանի անվան օպերայի և բալետի թատրոնի վերանորոգման համար: Ի դեպ, Պավել Սաֆարյանը Սպենդիարյանի փոխարեն ասաց՝ «Սպանդարյանի անվան»:
Ռադիոհեռուստահաղորդումների, հրատարակչական ոլորտի բյուջեն 2011-ի համեմատ ավելացել է 225 մլն դրամով: Այդուամենայնիվ, թվայնացման հետ կապված գումարներ 2012թ. բյուջեով նախատեսված չեն:
Սաֆարյանը տեղեկացրեց, որ մշակութային ծառայությունների համար 2012թ. բյուջեով հատկացվել է 14.3 մլրդ դրամ:
Պատգամավոր Լիլիթ Գալստյանը Սաֆարյանին հարցրեց՝ ինչո՞վ են պայմանավորված գրադարանների, թանգարանների, մշակութային տների աշխատողների աշխատավարձերը, Սաֆարյանը պատասխանեց. «Աշխատավարձի նվազում չի եղել, հայտարարում եմ պաշտոնապես` միջին աշխատավարձի նվազում չի եղել, և այն մնացել է նույնը, ինչը կար 2011թ. բյուջեում: Այլ հարց է, որ, այո, սոցիալական տեսակետից այդ աշխատավարձերը ցածր են և խոցելի»:
Մշակույթի նախարար Հասմիկ Պողոսյանն էլ իր խոսքում նկատեց՝ անշուշտ, մշակութային ոլորտի աշխատողների աշխատավարձերը ցածր են, և այդ առումով ամենախոցելին գրադարանի ոլորտն է:
Նախարարը նկատեց, որ 2012թ․ բյուջեն լիովին հնարավորութուն է տալիս գալիք տարում նախատեսված ծրագրերն իրականացնել:
ԲՀԿ-ական պատգամավոր Վարդան Բոստանջյանը նկատեց, որ միամիտները տեսնելով, որ մշակույթի նախարարությանը հատկացված բյուջեն 2011-ի համեմատ ավելացել է, կհուզվեն, բայց իրականում հարցն այն է, որ այդ ավելացումը տեղի է ունեցել ինչ-որ մի արտասահմանյան ընկերության 3մլրդ հատկացման հաշվին, որով նախատեսվում է վերազինել օպերայի և բալետի թատրոնը:
Պողոսյանն էլ արձագանքեց. «Ես շատ ցավում եմ, որ իմ այսքան ներկայացրած ծրագրերը այդքան անհետաքրքիր են եղել, և Դուք միայն այդ մասով ավելացումն եք հիշում»:
