ՌԴ նախագահ Դմիտրի Մեդվեդևն իր ֆրանսիացի գործընկերոջը` Նիկոլա Սարկոզիին ու նրա տիկնոջը` Կառլա Բրունիին, հոկտեմբերի 19-ին դուստր ունենալու կապակցությամբ նվիրել է «Սադկո» հեքիաթի մոտիվներով զարդարված զարդատուփ:
Նորածնին` Ջուլիային, թեև Մեծ քսանյակի նրա գործընկերներն անձամբ չեն տեսել, սակայն շնորհավորանքներ Սարկոզին արդեն հասցրել է լսել:
Բոլորն են հիշում, որ Կ. Բրունիի հղիության մասին հայտնի դարձավ կես տարի առաջ նորմանդական Դովիլ քաղաքում Մեծ ութնյակի հանդիպման ժամանակ: Հենց այն ժամանակ էին խոսում, որ Սարկոզին շնորհավորանքներ կլսի նոյեմբերյան գագաթնաժողովի ընթացքում, սակայն այս անգամ մեկ այլ հանգստավայրում` Կաննում:
Ի հեճուկս շատերի սպասումների` Ֆրանսիայի նախագահը ընտանիքին իր հետ Կանն չի տարել: Նրա գործընկերները ստիպված են բավարարվել միայն նորածնի լուսանկարներով, որոնք գագաթաժողովից առաջ տարածվել էին ֆրանսիական բոլոր լրատվամիջոցներում:
Մամուլի հաղորդմամբ` Ֆրանսիայի առաջին տիկինը նորածնի հետ մնացել է Վերսալի քաղաքամերձ նստավայրում: Այնտեղ է անցած հանգստյան օրերն անցկացրել և Սարկոզին` մինչ համաշխարհային տնտեսության խնդիրներով ծանրաբեռնվելը: Երջանիկ հայրիկը զբոսնել է կնոջ ու երեխայի հետ նստավայրի զբոսայգում: Լուսանկարներում երեխան մոր գրկին է, իսկ Սարկոզին գրկել է կնոջը:
Կաննում թեև անհամբեր էին սպասում Կառլային և Ջուլիային, սակայն ընբռնումով են վերաբերվել Նիկոլայի որոշմանը:
Կաննի քաղաքապետ Բեռնար Բրոշանը գովել է Սարկոզիի որոշումը: «Ես անձամբ էլ խորհուրդ կտայի նախագահին այդպես վարվել: Այստեղ պետք չէ քաղաքական վարկանիշը բարձրացնելու համար գովազդային տրյուկի դիմել»:
