Ֆինանսների փոխնախարար Պավել Սաֆարյանը այսօր ԱԺ-ում սփյուռքի , մշակույթի, կրթության և գիտության նախարարությունների 2012թ. բյուջեի քննարկման ընթացքում տեղեկացրեց, որ գալիք տարվա բյուջեում նախարարության պահպանման ծախսերը մնացել են նույն մակարդակին: Նա տեղեկացրեց, որ 2011-ին սփյուռքի նախարարության բյուջեն կազմել է 454 մլն դրամ, 2012-ին` 496 մլն, ինչը պայմանավորված է համահայկական փառատոնի անցկացման ծախսերի ավելացմամբ: Միայն այդ փառատոնի համար անհրաժեշտ է 84 մլն դրամ լրացուցիչ ֆինանսավորում:
Սփյուռքի նախարար Հրանուշ Հակոբյանը ներկայացրեց այն աշխատանքները, որոնք նախարարությունն իրականացրել է այս տարի, և ընդգծեց 2012թ. իրենց առաջարկությունները:
Նա տեղեկացրեց, որ նախարարությունը սփյուռքի ամառային դպրոց ստեղծելու առաջարկ է ներկայացրել:
Իրականացնելու են նաև կրթամշակութային ծրագրեր՝ ԱՊՀ երկրներում:
Հակոբյանը նշեց, որ 2011թ. կազմակերպել են 24 համաժողովներ, մյուս տարի նախատեսվում է շարունակել դրանք, մասնավորապես անցկացվելու են հայագետների, լրագրողների, ճարտարապետների համաժողովներ. «Համաժողովներն արդեն լինելու են ավելի գործակցային․ եթե այս տարի Ճարտարապետների համաժողովը հիմնականում ճանաչողական էր, ապա գալիք տարի մասնակից ճարտարապետներն արդեն ներկայացնելու են իրենց աշխատանքները»:
Հակոբյանը տեղեկացրեց, որ Հանրայինի եթերով հեռարձակվող «Սփյուռքի ժամ» հաղորդաշարը լինելու է նաև մյուս տարի, և այդ նպատակով բյուջեով նախատեսված են որոշակի գումարներ:
Նա նշեց, որ այս տարի կավարտվեն նաև աշխատանքները էլեկտրոնային թանգարանի շուրջ:
2012-ի «Արի տուն» ծրագրով ևս նախատեսված է 800 հոգու մասնակցություն՝ ինչպես այս տարի: Հրանուշ Հակոբյանը նշեց, որ հնարավորություն կար այս տարի ընդլայնել այս ծրագրի մասնակիցների թիվը, սակայն կային ֆինանսական որոշ խնդիրներ: Նա նշեց, որ կցանկանար ավելացվեր «Արի տուն» ծրագրի բյուջեն, ինչպես նաև ավելի շատ ուշադրություն դարձվեր ամառային դպրոցի գործունեությանը:
Նախարարը նաև նկատեց, որ շարունակություն է ունենալու հայրենադարձության ծրագիրը:
2012թ. բյուջեով սփյուռքի համայնքներ առաքվող գրքերի համար նախատեսված գումարները նվազել են: ՀՅԴ-ական պատգամավոր Լիլիթ Գալստյանի հարցին՝ ո՞րն է այդ նվազման պատճառը, Հակոբյանը նշեց, որ 2011թ. այդ նպատակով հատկացվել էր 11 մլն, սակայն օգտագործվել է 7 միլիոնը. «Այս տարվա փորձը ցույց տվեց, որ 11 մլն-ն շատ է, և այդ ծրագրին այդքան հատկացում անհրաժեշտ չէ, ավելին` չեղավ համայնք, որտեղ գիրք չհասցնենք»:
Հակոբյանը նշեց, որ սփյուռքի համայնքներ գրքեր հասցնում են հիմնականում նախագահի օդանավով, ինչպես նաև նախարարություն այցելած սփյուռքահայերին են ծանրաբեռնում գրքերով՝ այդ կերպ խնայելով նախատեսված գումարները:
Սփյուռքի նախարարը շեշտեց, որ 2012թ. բյուջեն նախարարությանը հնարավորություն է տալիս իրականացնել բոլոր ծրագրերը: