Լրագրող Արմեն Դուլյանը Ej էլեկտրոնային ամսագրի (ejournal.am) իր էջում գրում է.
«Այս ընտրությունները որակական հեղափոխություն են լինելու մեր երկրի ու բոլորիս համար»՝ այսպես է ասել Հայաստանի նախագահի աշխատակազմի ղեկավարի առաջին տեղակալի պաշտոնից ազատված եւ կես տարուց անցկացվելիք ընտրությունների ժամանակ հանրապետականների շտաբի ղեկավար Հովիկ Աբրահամյանի թիվ մեկ ենթական՝ Միքայել Մինասյանը։
Այսինքն՝ սցենարն այսպիսին է։ Հանրապետականները վերջին տարիներին հայաստանցիներին ոչ մի լավ բան չբերեցին։ Նույնիսկ երբ Ռոբերտ Քոչարյանը փաստեց՝ «Բայց իմ ժամանակ ավելի լավ էր», հանրապետականները ջուրը բերանն առան։ Ու սպասվում է համաշխարհային ճգնաժամի նոր ալիք։
Մայիսյան ընտրություններում քվե ապահովելու ընդամենը երկու լծակ կա։ Ադմինիստրատիվ՝ Հովիկ Աբրահամյան։ Եվ հեռուստատեսային՝ բոլոր թիվիները բռում պահող Միքայել Մինասյան։
Որևէ տեղական ղեկավար Հովիկ Աբրահամյանի ցուցումը չի՞ կատարի՝ վաղը մեեեեեեեծ պրոբլեմներ կունենաս, ախպեր ջան։ Որևէ առաջատար հեռուստատեսություն նախագահի փեսայի ասածի դեմ գնա՞ց։ Ընդամենը մի հեռախոսազանգ նախագահականից. «Հարկային՝ նստի սրանց ընդդիմադիր գլխին ու վաղը կզեկուցես…»։
Բայց բնորոշումը շատ լավն էր՝ հեղափոխական ընտրություններ… Ինչ կատակասերն եք, պարոն Աբրահամյան և պարոն Մինասյան…
