«ՀՀ Մարդու իրավունքների պաշտպանվածության մասին խոսելն անիմաստ է, պետք է խոսել միայն խախտումների մասին»,- կարծիք հայտնեց Հելսինկյան ասոցիացիայի Վանաձորի գրասենյակի նախագահ Արթուր Սաքունցը: Սաքունցի խոսքերով, երկրում, որտեղ կան քաղբանտարկյալներ, որտեղ ազատազրկված է լրագրողը, իհարկե՝ նաև քաղաքական դրդապատճառներով, որտեղ սպանում են ոստիկանության բաժին բերման ենթարկված Վահան Խալաֆյանին, որտեղ դպրոցում մահանում է տասնամյա Դերենիկ Գալստյանը, և քրեական գործը կարճվում է, որտեղ ՔԿՀ-ում մահանում է Սլավիկ Ոսկանյանը, որը մեղադրվում էր ոստիկանության աշխատակցի մոր սպանության մեջ, որտեղ զինված ուժերում, դեռ տարին չավարտված, 42 մարդկային զոհ կա, որից ընդամենը 10-ը՝ հրադադարի խախտումով, որտեղ խոշտանգումների վերաբերյալ հաղորդումները անուշադրության են մատնվում ոչ միայն ոստիկանության, այլև դատական իշխանությունների կողմից`իրավունքների մասին խոսելն ավելորդ է: «Հայաստանում չկա մի մարմին, որտեղ չխախտվեն մարդու իրավունքները,ավելին՝ խախտողները հովանավորվում են դատական իշխանության կողմից: Մեր երկրում մարդու իրավունքների նկատմամբ չկա հարգանք: Այստեղ մարդու արժանապատվության պաշտպանվածությունը զրո է»,-ասաց Արթուր Սաքունցը: