Ադրբեջանական Salam News գործակալության փոխանցմամբ՝ Ադրբեջան այցելած Միջազգային ճգնաժամային խմբի (ICG) եվրոպական ծրագրերի տնօրեն Սաբինա Ֆրեյզերը լրագրողներին հայտարարել է, որ եթե Հայաստանում իշխանափոխություն տեղի ունենա, ապա դա իր ազդեցությունը կունենա Ղարաբաղյան հիմնախնդրի կարգավորման վրա.
«Առաջիկա երկու տարիներին ես որևէ առաջընթաց չեմ ակնկալում ղարաբաղյան բանակցային գործընթացում։ Առաջիկա երկու տարիներին նախագահական ընտրություններ են տեղի ունենալու նախ ԵԱՀԿ Մինսկի խմբի համանախագահող երկրներում՝ Ռուսաստան, ԱՄՆ, Ֆրանսիա, ապա նաև Հայաստանում և Ադրբեջանում։
Փորձը ցույց է տալիս, որ ընտրությունների նախաշեմին բանակցություններն արգելակվում են։ Միջազգային հանրությունը, այդ թվում՝ նաև համանախագհները մեծ հույսեր էին կապում կազանյան հանդիպման հետ և մեծ ակնկալիքներ ունեին Հայաստանի ու Ադրբեջանի նախագահներից։ Դժբախտաբար, այդ հանդիպումն ավարտվեց անարդյունք։
Հակամարտող կողմերի միջև քաղաքացիական հասարակության մակարդակով հանդիպումների անցկացումն ընդունելի է համարվում։ Եթե Հայաստանում տեղի ունենա իշխանափոխություն, ապա դա անպայմանորեն ազդելու է Ղարաբաղյան հակամարտության խաղաղ կարգավորման վրա»։