Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի համանախագահներ Ռոբերտ Բրադկեն (ԱՄՆ), Բեռնար Ֆասիեն (Ֆրանսիա), Իգոր Պոպովը (Ռուսաստան) և ԵԱՀԿ գործող նախագահի անձնական ներկայացուցիչ Անջեյ Կասպրշիկն իրենց տարեկան գործունեության մասին զեկույց են ներկայացրել ԵԱՀԿ Մշտական խորհրդին։
Ամփոփելով իրենց տարեկան գործունեությունը՝ համանախագահներն ընդգծել են, որ այս տարի 8 անգամ այցելել են տարածաշրջան և, դրանից բացի, 14 անգամ տարբեր երկրներում հանդիպումներ են ունեցել Հայաստանի և Ադրբեջանի նախագահների հետ։
Համանախագահները վերջին 4 ամիսների ընթացքում 4 անգամ հատել են հայ-ադրբեջանական շփման գիծը, ինչը, ըստ նրանց, վկայում է, որ այդ շփման գիծը չի հանդիսանում տարածաշրջանի ժողովուրդների միջև պատնեշ, և որ կողմերի ցուցաբերած պատրաստակամության դեպքում հնարավոր կլինի ռազմական կոորդինացիան՝ հրադադարի ռեժիմի ամրագրման համար։
Համանախագահների կարծիքով՝ Ղարաբաղյան հակամարտության կարգավորման ուժային տարբերակն անընդունելի է, և հակամարտող կողմերը պետք է քաղաքական կամք ցուցաբերեն ստատուս քվոն փոփոխելու և հակամարտության խաղաղ կարգավորմանը հասնելու համար։
Համանախագահները նաև ազդարարել են հավելյալ միջոցների մասին, որոնք ուղղված են հրադադարի ռեժիմի ամրագրմանը, հակամարտող կողմերի միջև վստահության մթնոլորտի բարելավմանը և տարածաշրջանի ժողովուրդների միջև փոխըմբռնման ավելացմանը։
Համանախագահները հայտարարել են, որ մտադիր են այս ամսվա վերջին այցելել տարածաշրջան, ուր և հակամարտող կողմերի հետ քննարկելու են բանակցային գործընթացի հետագա ընթացքը։