Ավստրալիայի կառավարությունը պետք է հետևողական լինի, որ Ջուլիան Ասանժի գործը արդարացի և անաչառ քննվի, ինչպես նաև երաշխավորվի, որ Շվեդիայում WikiLeaks-ի հիմնադրին չեն հանձնի ԱՄՆ-ին: Ինչպես հայտնում է Daily Telegragh-ը, նմանատիպ հայտարարություն է արել Ասանժի փաստաբան Ջեֆրի Ռոբերթսոնը:
Ասանժի փաստաբաններն անհանգստացած են, որ Շվեդիայում նրան չհանձնեն ԱՄՆ-ին, ընդ որում, ըստ երկու երկրների միջև եղած համաձայնության, արտահանձման գործընթացը կարող է սկսվել առանց Մեծ Բրիտանիայի համաձայնության: Փաստաբանները կարծում են, որ այդ դեպքում կարող է միջամտել Ավստրալիայի կառավարությունը, քանի որ ԱՄՆ-ում Ասանժին կսպառնա երկարաժամկետ ազատազրկում, եթե նրան մեղավոր ճանաչեն պետական գաղտնիքները հրապարակելու մեջ: Մինչդեռ ԱՄՆ-ում Ասանժի դեմ դեռ մեղադրանքներ չեն առաջադրվել:
Հիշեցնենք, որ Լոնդոնի Բարձրագույն դատարանը նոյեմբերի 2-ին մերժել է WikiLeaks կայքի հիմնադիր Ջուլիան Ասանժի բողոքը` այս տարվա փետրվարին ստորին դատարանի վճռի դեմ իրեն Շվեդիա արտահանձնելու վերաբերյալ: Ասանժին տրված էր երկշաբաթյա ժամկետ դատարանի վճիռը բարձրագույն դատարանում բողոքարկելու համար: Շվեդիայում Ասանժին մեղադրում են սեռական բնույթի հանցագործության մեջ, որից տուժել են երկու կանայք: Արդյունքում նրան կարող են մեղադրել բռնաբարության մեջ:
