Համաշխարհային մարքեթինգի հիմնադիր Ֆիլիպ Կոտլերի Հայաստան այցելության կազմակերպչական աշխատանքներից և դասընթացներին մասնակցության համար անհրաժեշտ տոմսերի գներից բողոքող Հայաստանի պետական տնտեսագիտական համալսարանի մարքեթինգի ամբիոնի դասախոս Նարեկ Ղուկասյանը լրագրողների հետ զրույցում նշեց, որ 80 րոպե դասընթացը ոչինչ չի տալու ուսանողին, և պետք էր այս սեմինարները կազմակերպել մարքեթինգի մասնագետների համար, ովքեր հետագայում ստացած նոր տեղեկությունները կփոխանցեն ուսանողներին. «Եթե մենք ասում ենք, որ Կոտլերի այցով մարքեթինգ ենք զարգացնելու հնարավոր չէ, մարքեթինգի զարգացմամբ զբաղվում են մարքեթինգի պրոդուկտ տվող բուհերը»:
Ղուկասյանը նաև նկատեց, որ ուսանողն ի վիճակի չէ ընդամենը մեկ դասընթացի համար վճարել 25 հազար դրամ՝ փոխարենը, իհարկե, չստանալով իրական գիտելիքներ: Նա նշեց, որ պետք է ակադեմիական շրջանակների համար անվճար հատուկ դասընթաց կազմակերպել, ինչը կարող էր անել Մարքեթինգի հայկական ասոցիացիան՝ լինելով հասարակական կազմակերպություն:
Ղուկասյանը նաև նշեց, որ 50 անվճար տոմսերը շահած ուսանողների մեծ մասը մարքեթինգի ամբիոնում չեն սովորում, այլ ասենք՝ արևելագիտական, իրավաբանական, բանասիրական ֆակուլտետներից են. «Էդ ձևով ենք մենք մարքեթինգ զարգացնում Հայաստանում»:
Նա նաև տեղեկացրեց, որ 30 տոմս ձեռք է բերել ԱԺ նախկին նախագահ Հովիկ Աբրահամյանը և բաժանել ուսանողներին: