«Մեր մարքեթինգային շաբաթը սկսվելու է նոյեմբերի 11-ին և տևելու է մինչև նոյեմբերի 17-ը: Այդ շաբաթվա շրջանակներում նոյեմբերի 13-ին Ֆիլիպ Կոտլերը քառօրյա այցով կգա Հայաստան, և 4 օր մենք հնարավորություն ենք ունենալու տարբեր մակարդակով հաղորդակցվելու նման աստղի հետ: Ոգևորությունը շատ է, չգիտեմ ի՞նչ դժգոհությունների մասին է խոսքը»,- այսօր լրագրողների հետ զրույցի ընթացքում նշեց «Ֆ. Կոտլերը Հայաստանում 11.11.11» ծրագրի ղեկավար Արմեն Սարգսյանը:
Նա նշեց, որ համաֆինանսավորում կա, և այդ իսկ պատճառով ուսանողները կարող են Կոտլերի 80 րոպե դասընթացի մասնակցության տոմսերը ձեռք բերել 25 հազար դրամով: Սարգսյանի խոսքերով՝ բացի ուսանողներից կան նաև այլ թիրախային խմբեր, և նրանց համար գներն ավելի բարձր են սահմանված` մինչև 1000 դոլար: «Առաջին լրատվական»-ի հարցին, թե ինչպե՞ս է որոշվել տոմսերի արժեքը, Սարգսյանը պատասխանեց. «Կոտլերի բոլոր ծրագրերը տարբեր երկրներում ունեն բավականին բարձր գներ, և Եվրոպայում դրանք հասնում են մինչև 3-4 հազար եվրոյի: Գները հաստատվել և որոշվել է մեր և Kotler Impact ընկերության կողմից, և դրանք նախատեսված են այդքան, որովհետև դրանից ցածր հնարավոր չէր»:
Արմեն Սարգսյանը նշեց, որ մարքեթինգի ոլորտում աշխատողները և մարքեթինգ ուսումնասիրող ուսանողները այս ծրագրի միջոցով հնարավորություն կստանան շփվել և լսել կենդանի լեգենդին: Նա նկատեց, որ բոլոր մասնակիցներին տրվելու է վկայագիր դասընթացներին մասնակցելու վերաբերյալ:
Սարգսյանը տեղեկացրեց, որ Հայաստանում գործող գրեթե բոլոր խոշոր ձեռնարկությունները հայտնել են իրենց մասնակցության մասին: Նա նաև նշեց, որ դեռևս կան չվաճառված տոմսեր, ինչի պատճառն այն է, որ նախապես քիչ տոմս է նախատեսված եղել, այնուհետև դրանց թիվն ավելացվել է:
Սարգսյանը նաև տեղեկացրեց, որ Կոտլերը Հայաստանում կներկայացնի իր նոր «Մարքեթինգ 3,0» հայեցակարգը: