Այսօր Նորվեգիայի մայրաքաղաք Օսլոյում տեղի կունենա Նոբելյան մրցանակի հանձնման ամենամյա արարողությունը, սակայն դրան չի կարող մասնակցել այս տարվա Խաղաղության մրցանակի դափնեկիր, չին իրավապաշտպան Լյու Սյաոբոն, որը Չինաստանում այլախոհության համար 8 տարվա ազատազրկման է դատապարտված և հիմա գտնվում է բանտում: Մրցանակը չեն կարող ստանալ ոչ նրա կինը, ոչ էլ հարազատները: Առաջինը տնային կալանքի տակ է այն օրվանից, երբ Նոբելյան կոմիտեն հայտարարել էր այս մրցանակը Սյաոբոյին հանձնելու մասին, իսկ հարազատներին խստիվ արգելվել է լքել երկիրը:
Սա առաջին դեպքն է 114 տարվա մեջ, երբ շքանշանը և 10 մլն կրոն (1,45 մլն դոլար) պարգևը կմնան չհանձնված:
«Այսպիսի իրավիճակ, երբ մրցանակակիրը ներկա չի եղել արարողությանը, եղել է միայն մեկ անգամ, երբ 1935 թ. մրցանակը հանձնվել է գերմանացի լրագրող Կառլ ֆոն Օսեցկուն»,- ասել է Նոբելյան կոմիտեի մշտական քատուղար Հեյր Լյունդեստադը: Այն ժամանակ, սակայն, չեկը ստացել է մրցանակակրի փաստաբանը, որը հետագայում յուրացրել էր գումարը:
Կազմակերպիչները բեմի վրա տեղադրելու են դատարկ աթոռ, որը, ըստ կազմակերպիչների, լուրջ ազդեցություն կունենա, իսկ ամբիոնի մոտ դրված է լինելու մրցանակակրի նկարը:
Արարողության ժամանակ կկարդացվի Լյու Սյաոբոյի տեքստերից մեկը:
Հիշեցնենք, որ երբ հայտնի դարձավ, որ խաղաղության մրցանակի դափնեկիր է դարձել Լյու Սյաոբոն, Չինաստանի իշխանությունները մեծ աղմուկ բարձրացրին` հայտարարելով, թե մրցանակը բաժին է հասել հանցագործին: Չինական իշխանությունները կոչ են արել շատ երկրների չմասնակցել այդ միջոցառմանը: Արդեն հայտնի է այն երկրների ցանկը, որոնք չեն մասնակցի այս տարվա արարողությանը: Դրանք մոտ քսանն են՝ Ղազախստան, Կոլումբիա, Թունիս, Սաուդյան Արաբիա, Պակիստան, Սերբիա, Իրաք, Իրան, Վիետնամ, Աֆղանստան, Վենեսուելա, Ֆիլիպիններ, Եգիպտոս, Սուդան, Կուբա և Մարոկկո:
Միջոցառմանը չի մասնակցում նաև Ռուսաստանը, քանի որ դեսպանը այդ օրերին Օսլոյում չի գտնվելու: Վերջին պահին մասնակցության մասին հայտարարել է Ուկրաինան, որը մինչ այդ հրաժարվել էր մասնակցել:
