Այս տարի «Հայաստան» համահայկական հիմնադրամի 11-րդ համաեվրոպական հեռախոսամարաթոնը տեղի կունենա 2011թ. նոյեմբերի 17-ից 20-ը Ֆրանսիայում: Հեռախոսամարաթոնին այս տարի մասնակցում են Ֆրանսիան, Գերմանիան, Շվեյցարիան և Հոլանդիան, կան նաև այլ մասնակից երկրներ, որոնց ցանկը դեռ հստակեցվում է: Այս մասին «Առաջին լրատվական»-ին տեղեկացրին «Հայաստան» համահայկական հիմնադրամի հասարակայնության հետ կապերի բաժնից:
Այն հարցին, թե որքա՞ն են արժենում հեռախոսամարաթոնի կազմակերպչական հարցերը, պատասխանեցին, որ այս հարցը լուծում են մասնակից տեղական մարմինները: Առայժմ նաև հայտնի չէ, թե որ բնակավայրերի վերակառուցման համար է նախատեսվելու մարաթոնից ստացված գումարը, հեռուստամարաթոնի արդյունքը հայտնի լինելուց հետո միայն կհստակեցվեն հիմնադրամի գործունեության շրջանակները խնդիր ունեցող բնակավայրերում: Այս տարի հեռախոսամարաթոնին կենդանի կատարումներ չեն լինելու. ցուցադրվելու են միայն տեսագրված հոլովակներ:
Նշենք, որ բարեգործական ակցիան արդեն 11-րդ անգամ կազմակերպվում է Ֆրանսիայի հայկական հիմնադրամի կողմից, որի նպատակն է աջակցել Հայաստանին և Ղարաբաղին: Ամեն տարի, չորս օրվա ընթացքում, ավելի քան 600 կամավոր հեռախոսով կապվում են 50.000 ընտանիքի և ֆրանսիական ընկերությունների հետ: Անցած տարի նվիրատուների միջոցով հավաքվել էր ավելի քան 1 մլն եվրո, որն օգտագործվել էր Ղարաբաղի սոցիալ-տնտեսական մի շարք խնդիրներ լուծելու համար:
Phonéthon 2011-ին կաջակցեն Միշել Դրյուքերը, Վինսենտ Բագույանը, Պատրիկ Ֆիորին, Ռոբերտ Գյոդակյանը, Պասկալ Լեգիտիմուսը, Մեթյու Մադենյանը, Անդրե Մանուկյանը, Ջեկի Ներսեսյանը, Արմեն Պետրոսյանը, Հելեն Սեգարան, Շառլ Վիյանյովը: