Հինգշաբթի օրը Tweetter միկրոբլոգերի կայքում 5,5 մլն երկրպագու ունեցող Քիմ Քարդաշյանը իր երկրպագուներին կոչ է արել դիմել Նենսի Փելոսիին՝ օրակարգ մտցնելու թիվ 252 բանաձևը Հայոց ցեղասպանության վերաբերյալ: Սա հետևել է Սերժ Թանկյանի Facebook, Twitter սոցիալական ցանցերում և իր կայքում արած այն գրառմանը, որով նա իր երկրպագուներին կոչ է անում աջակցել մարդու իրավունքներին վերաբերող հիշյալ օրինագծին: Այս մասին հայտնել է Ամերիկայի Հայ դատի գրասենյակը:
«Մենք ծափահարում ենք Քիմ Քարդաշյանին, Սերժ Թանկյանին և Ցեղասպանության դեմ պայքարող բոլոր այն ակտիվիստներին, ովքեր դիմել են խոսնակ Փելոսիին` Հայոց Ցեղասպանության բանաձևի քվեարկությունը օրակարգ մտցնելու համար: Բարեխիղճ ամերիկացիները ցանկանում են վերջ դնել Ցեղասպանության այս ցիկլին, և որպեսզի դա տեղի ունենա, հրեշին պետք է իր անունով անվանես»,- ասել է Ամերիկայի Հայ դատի գրասենյակի գործադիր տնօրեն Արամ Համբարյանը:
Ավելի վաղ այս շաբաթ, Ամերիկայի Հայ դատի գրասենյակի տարածքային ղեկավարներ Աիդա Դիմեջյանը և Ստեփան Մեսրոբյանը հանրային կոչ էին արել խոսնակին՝ քվեարկել մարդու իարվունքների կարևոր այս օրենքի օգտին: «Ցեղասպանության զոհերի ոգին, այն վերապրածներն ու նրանց ժառանգները դիմում են խոսնակին՝ օրակարգ մտցնել բանաձևը Կոնգրեսի 111-րդ նստաշրջանից առաջ, որը սկսվում է 10 օրից»,- հայտարարել են Դիմեջյանն ու Մեսրոբյանը: «Հայերն ու ողջ աշխարհը ցանկանում են իմանալ, թե Ներկայացուցիչների պալատի յուրաքանչյուչ ներկայացուցիչ ինչ դիրքորոշում ունի ամերիկյան միասնական գիտակցության այս կենսական կարևորագույն հարցի վերաբերյալ»: