Ականատեսների պատմելով, վերջերս Ռոբերտ Քոչարյանի կրտսեր որդին` Լեւոնը, տիկնոջ` Սիրուշոյի հետ այցելել է Արագածոտնի մարզի Սասունիկ գյուղի «Արմենիա Վայն» գինու եւ «Մեդվեդևկա» օղու արտադրամաս` ծանոթանալու ապագա գործարանի տարածքին: Խոսակցություններ կան, որ տվյալ արտադրամասերը հովանավորվում են հենց Քոչարյանի ընտանիքի կողմից: Հատկանշական է այն հանգամանքը, որ այս այցերը համընկել են երեկ կառավարության օրակարգում քննարկվող ՀՀ Արագածոտնի մարզի Սասունիկի գյուղական համայնքի հողերի օգտագործման ժամանակավոր սխեման հաստատելու մասին քննարկման հետ:
Այսպիսով, ՀՀ կառավարությունը որոշել է Արագածոտնի մարզի Սասունիկի գյուղական համայնքի վարչական սահմաններում գտնվող, քաղաքացու սեփականություն հանդիսացող բնակավայրի այլ հողերից 0.098 հեկտար փոխադրել ջրային հողերի կատեգորիա եւ փոխանակել պետական սեփականության 0.077 հեկտար ջրային հողերի հետ: Քաղաքացու սեփականություն հանդիսացող` սույն որոշման 1-ին կետի 1) ենթակետով փոխանակված 0.077 հեկտար ջրային հողերը եւ 0.3255 հեկտար բնակավայրի այլ հողերը փոխադրել արդյունաբերության, ընդերքօգտագործման եւ այլ արտադրական նշանակության օբյեկտների հողերի կատեգորիա` ՀՀ օրենսդրությամբ սահմանված կարգով արդյունաբերական օբյեկտների կառուցման համար: Միջգերատեսչական հանձնաժողովի եզրակացության հիման վրա հողերի կատեգորիան փոխելու մասին ժամանակավոր սխեման համաձայնեցվել է եւ հաստատվել ՀՀ քաղաքաշինության, գյուղատնտեսության, բնապահպանության, էներգետիկայի եւ բնական պաշարների, էկոնոմիկայի, մշակույթի նախարարությունների, ՀՀ կառավարությանն առընթեր անշարժ գույքի կադաստրի պետական կոմիտեի եւ ՀՀ տարածքային կառավարման ջրային տնտեսության պետական կոմիտեի կողմից: Համայնքի հողերի օգտագործման ժամանակավոր սխեմայի վերաբերյալ առկա է համայնքի ավագանու որոշումը՝ սխեմային հավանություն տալու մասին, կա նաեւ մարզպետի համաձայնությունը:
Երեկ մենք փորձեցինք Սասունիկի գյուղապետ Արման Մարգարյանից ճշտել, թե ինչ արտադրամաս են պատրաստվում կառուցել գյուղի տարածքում: Նա մեզ հետ զրույցում նշեց, որ ներկա դրությամբ գյուղում գործում է «Արմենիա Վայն» գինու գործարանը եւ «Մեդվեդեւկա» օղու արտադրամասը: «Բայց այս պահին ես չգիտեմ, թե իրենք ինչ նոր արտադրություն են բացելու»,- ասաց գյուղապետը: Մեր այն հարցին, թե ճի՞շտ են այն խոսակցությունները, որ տվյալ արտադրամասերը պատկանում են ՀՀ երկրորդ նախագահ Ռոբերտ Քոչարյանին` պատասխանեց. «Քոչարյանների ընտանիքի մասին ոչինչ չգիտեմ, ինձ մոտ որպես սեփականատեր գրանցված է Լենդրուշ Վարդանյանը: Ավելին, սեփականատերը հարկերը վճարում է շատ պարտաճանաչ, մի քանի օր առաջ են բերել տարին փակել»:
Ի դեպ, գյուղապետն անգամ տեղյակ էլ չէր, որ վերջերս Լեւոն Քոչարյանն ու Սիրուշոն այցելել են գործարան: Սակայն ջրագծերի տեղափոխության մասին կառավարության որոշմանը մասնակիորեն տեղեկացված էր: Նրա խոսքերով, այն հողը, որով ջրագիծն է անցնում, Լենդրուշ Վարդանյանի սեփականությունն է: «Ինքը` որպես սեփականատեր, հողը փոխում է պետական սեփականության հետ: Այսինքն` իր հողի վրա կառուցում է նոր ջրատար` իր ուժերով, իր միջոցներով: Իսկ հին ջրատարը անցնում է իր տարածքով: Սեփականատերը ցանկանում է ջրատարը վերանորոգել, որպեսզի կարողանա տարածքում նոր կառույց կառուցել, բայց ինչ արտադրություն` չգիտեմ»,- սահմանափակվեց Սասունիկի գյուղապետ Արման Մարգարյանը: Մեր աղբյուրների փոխանցմամբ՝ ապագայում Քոչարյանների ընտանիքին պատկանող կոնյակի գործարանը կառուցվելու է նշված տեղում: Իսկ կոնյակի արտադրության համար պարտադիր նախապայման է, որ արտադրամասը տեխնիկապես համապատասխանի բարձր չափանիշների: Հատկապես այն դեպքում, որ կոնյակի շուկայում Քոչարյանները մրցելու են ոչ միայն Գագիկ Ծառուկյանի, «Պեռնո Ռիկարի», Արթուր Բաղդասարյանի հետ, այլեւ միջազգային շուկա դուրս գալու նպատակներ ունեն: Իսկ կոնյակի լայն սպառման եւ սպառողներին հարբեցնելու համար օգտագործվելու է Սիրուշոյի տեղական եւ արտերկրյա հեղինակությունը: Ավելին՝ կոնյակի արտադրության բիզնեսով զբաղվելու գաղափարը, ասում են, հենց Սիրուշոյինն է, որին իր «դաբրոն» է տվել սկեսրայրը: Ստացվում է, որ Ռոբերտ Քոչարյանը ՀՀ քաղաքացիներին դաղելուց հետո, հիմա էլ որոշել է հարբեցնել:
