ՀԱԿ ակտիվիստ Տիգրան Առաքելյանի փաստաբան Ստեփան Ոսկանյանը, անկախ նոր ոստիկանապետի նշանակումից, չի կարծում, որ հատուկ քննչական ծառայության վարույթում գտնվող գործի վրա ոստիկանությունն այսուհետ լավ կամ վատ ազդեցություն ու միջամտություն կարող է ունենալ: Այս մասին նա ասաց «Առաջին լրատվական»-ի հետ զրույցում` պատասխանելով հարցին, թե ի՞նչ ակնկալիքներ ունի ՀՀ նախկին ոստիկանապես Ալիկ Սարգսյանի պաշտոնանկության և նրա պաշտոնում Վլադիմիր Գասպարյանի նշանակման` գործի վրա թողնելիք ազդեցության առումով:
«Չեմ կարծում, որ Ալիկ Սարգսյանի պաշտոնանկությունը որևէ կերպ ազդի գործի վրա, այն պատրաստվում են ուղարկել դատարան: Գործը քննվում է ՀՔԾ-ում, չեմ կարծում, որ ազդեցություն կամ փոփոխություններ կլինեն: Միաժամանակ, ՀՀ ոստիկանապետի պաշտոնում Վլադիմիր Գասպարյանի նշանակման առումով ինչպես դրական, այնպես էլ բացասական սպասելիքներ կան: Դրական մասով սպասելիքներ ունեմ, որ դատարանում հնարավոր է` փորձենք ապացուցել տղաների անմեղությունը, իսկ բացասական իմաստով էլ կնշեմ այն հանգամանքը, որ Տիգրանը մեղադրյալի կարգավիճակում է, և գործն արդեն ուղարկվում է դատարան»,- ամփոփեց փաստաբանը:
Նշենք, որ ՀՀ նախկին ոստիկանապետ Ալիկ Սարգսյանին այդ պաշտոնում կփոխարինի պաշտպանության փոխնախարար, գեներալ-լեյտենանտ Վլադիմիր Գասպարյանը:
Ալիկ Սարգսյանը նշանակվել է ՀՀ նախագահի խորհրդականի պաշտոնում:
