Ռուսական Regnum լրատվական գործակալության փոխանցմամբ՝ Գերմանիայի կանցլեր Անգելա Մերկելը Թուրքիայի վարչապետ Ռեջեփ Էրդողանի հետ հանդիպումից հետո հայտարարել է, որ ահաբեկչության և մասնավորապես Քրդստանի աշխատավորական կուսակցության (PKK) դեմ պայքարում Գերմանիան Թուրքիայի կողքին է.
«Գերմանիան ամեն ինչ կանի, որպեսզի Թուրքիային օգնի տվյալ հարցում։ Գերմանաբնակ թուրքերը Գերմանիայի մի մասն են, այդ մասին պետք չէ երկար խոսել։ Մեզ ուրախացնում են Մեսութ Օզիլի (Մադրիդի «Ռեալ»-ի ու Գերմանիայի հավաքականի ֆուտբոլիստ) խփած գոլերը։ Մեր երկրների կապերը նախկինի նման ուժեղ են։
Մեր երկիր ժամանած մարդիկ կամուրջ են գցել երկու երկրների միջև։ Նրանցից ոմանց հեռանալը տխրեցնում է մեզ։ Գերմանաբնակ 3 միլիոն թուրքերը հատուկ կապեր են ձևավորում երկու երկրների միջև»։
Հանդիպման ժամանակ Էրդողանն ու Մերկելը քննարկել են Սիրիայի հարցը։ Մերկելը դատապարտել է այդ երկրի իշխանությունների կողմից մարդու իրավունքների խախտումը՝ ընդգծելով, որ ՄԱԿ-ն առավել կոշտ դիրքորոշում պետք է որդեգրի սիրիական ղեկավարության հանդեպ։
Հիշեցնենք, որ Էրդողանը Բեռլին է այցելել Գերմանիայի և Թուրքիայի միջև աշխատանքային միգրանտների մասին համաձայնագրի 50-ամյա հոբելյանին մասնակցելու համար։
Ի դեպ, Գերմանիան, Ֆրանսիայի հետ մեկտեղ, հանդիսանում է ԵՄ-ին Թուրքիայի անդամակցության կատաղի հակառակորդ։
