«Առաջին լրատվականը» Երևանի կենտրոնական փողոցներից մեկում հարցումների միջոցով փորձեց պարզել, թե ինչ են մտածում մեր քաղաքացիները Երևանի քաղաքապետ Գագիկ Բեգլարյանի հրաժարականի մասին: Պարզվեց, որ հարցված քաղաքացիների մի մասն ընդհանրապես տեղյակ չէր, որ Երևանի քաղաքապետը հրաժարական է տվել, և առաջին անգամ էր լսում այդ մասին: Մյուս մասը լսել էր այդ մասին, բայց տեղյակ չէր, թե որն է եղել հրաժարականի պատճառը, կամ էլ այդ մասին ուներ շատ կցկտուր տեղեկություններ: Երրորդների համար տեղեկատվության աղբյուրը եղել էր միայն հեռուստատեսությունը, և նրանք որևէ տեսակետ դժվարացան հայտնել: Կային քաղաքացիներ, որոնց չէր հետաքրքրում Երևանի քաղաքապետի հրաժարականը, և հարցը մինչև վերջ չլսած, ձեռքը թափ տալով, հեռանում էին: «Չեմ կարող ասել», «հրաժարականը սպասելի էր», «լսել ենք տարբեր բաներ, բայց չենք կարող ասել` այդ ծեծը եղե՞լ է, թե՞ ոչ, որովհետև պետք է ականատես լինես, որ ասես», «նրանք, որոնք բռնազավթել են իշխանությունը, վաղ թե ուշ այս ձևով են հեռանալու` անկախ այն բանից` քաղաքապետ է, թե` նախագահ», «ինձ չի հետաքրքրում, ես ընտրություններին չեմ մասնակցել, Գագիկ Բեգլարյանին էլ չեմ ընտրել», «քաղաքի նորմալ տղա էր, բայց որ այդպիսի բան է արել, պետք է հրաժարական տար», «որպես քաղաքապետ լավ էր աշխատում, բայց եթե այդպիսի միջադեպ է եղել, մարդ է ծեծել, պետք է հրաժարական տար և հեռանար պաշտոնից», «ես իրեն ճանաչում եմ այնքանով, որ տղան իմ երեխայի հետ էր սովորում, ուրիշ բան չեմ կարող ասել», «հրաժարակա՞ն է տվել, ե՞րբ, առաջին անգամ եմ լսում, ես վերջին օրերին հեռուստացույց չեմ նայում», «ես ժամանակ չունեմ թերթեր կարդալու, չգիտեմ, տարբեր բաներ են ասում, կարծիք չեմ կարող հայտնել»,- ահա այն պատասխանները, որոնք ստացանք մեր` իրենց անունը հրապարակել չցանկացող քաղաքացիներից: Նրանք բոլորն էլ բավարարվեցին այսպիսի լակոնիկ պատասխաններով` հընթացս ասելով, որ քաղաքապետի հրաժարականն իրենց խնդիրներին չի վերաբերում: