ԱՄՆ բարձր տեխնոլոգիական ընկերությունները, ներառյալ Google-ը և Microsoft-ը, փրկել են ԱՄՆ նախագահ Բարաք Օբամային, որը կարող էր իր նախընտրական քարոզարշավի ժամանակ ֆինանսական խնդիրներ ունենալ, քանի որ Ուոլ Սթրիթի հսկաների աջակցությունը (նրանք եղել են 2008թ. նախագահի հովանավորները) զգալիորեն կրճատվել է: Այս մասին հաղորդում է Bloomberg գործակալությունը: Center for Responsive Politics կազմակերպության անկախ հետազոտողների տվյալներով` Օբամայի քարոզարշավի հովանավորների ցուցակի առաջին հորիզոնականում են Microsoft Corp. ընկերության թոփ-մենեջերները:
Վերլուծաբանները նշում են, որ այս նախընտրական քարոզարշավը հովանավորներից ստացված ֆինանսական միջոցների տեսանկյունից գերազանցել է 2007թ. ռեկորդը: Այդ ժամանակ Օբամայի ֆոնդի կապիտալը 80մլն դոլար էր, մինչդեռ այս տարի, սեպտեմբերի 30-ի տվյալներով, այդ գումարի չափը հասել է 88 մլն-ի: Սա կրկնակի անգամ մեծ է հանրապետական կուսակցության առաջ քաշած թեկնածու Միթթ Ռոմնիի հավաքած գումարից: Այս պահին Ռոմնին իր տրամադրության տակ ունի 33 մլն դոլար, ընդ որում՝ այդ միջոցների մի մասը նա ստացել է Ուոլ Սթրիթից, որը ժամանակին աջակցում էր Օբամային:
Գործակալության աղբյուրը նշում է, որ Կրեմնիևյան հովտի ընկերությունները արդեն Օբամային հատկացրել են 1.2 մլն դոլար: Բացի Microsoft-ից՝ Օբամային «դոնոր» ընկերությունների թվում նշվում են Google Inc.-ը, Չիկագոյի Chopper Trading LLC ընկերությունը, Oracle Corp.-ը և Cisco Systems Inc.-ը:
Օբամայի նախընտրական քարոզարշավի կազմակերպիչները ինտերնետ-ընկերությունների աջակցությունը ստանալու նպատակով ստեղծել են հատուկ կայք` «Տեխնոլոգիաները Օբամայի համար»: Այդ «փակ ակումբում» անդամակցությունն արժե 25 հազարից մինչև 35.8 հազար դոլար և իր մեջ ներառում է պարտադիր հանգանակություններ՝ ուղղված ԱՄՆ Ազգային դեմոկրատական կոմիտեի հիմնադրամին: Բացի այդ, նախագծի մասնակիցներն իրենց վրա պարտավորություն են վերցնում Օբամայի քարոզարշավը անցկացնել սոցիալական ցանցերում: Դրա փոխարեն այդ ընկերությունները իրավունք են ստանում առաջ քաշել իրենց տեխնո-ինդուստրիայի համար օգտակար օրինագծեր:
«Այժմ ընտրողներին հասնելու ուղիներն ամբողջությամբ փոխվել են,- կարծում են քաղաքական տեխնոլոգները:-Եթե դուք Facebook-ում ձեր տրամադրության տակ ունեք 1.5 մլրդ ամերիկացիներ, այդ հարթակը դառնում է բավականին հետաքրքիր»:
ԱՄՆ-ում նախագահական ընտրությունները տեղի կունենան 2012թ. նոյեմբերի 6-ին:
