Lenta.ru-ի փոխանցմամբ՝ Գերմանիայի Համբուրգ քաղաքը ներկայացնող փաստաբաններ Բրիտա Էդերն ու Հայնց Յուրգեն Շնայդերը դիմել են դատախազություն՝ ընդդեմ Թուրքիայի վարչապետ Էրդողանի, ինչպես նաև նախկին պաշտպանության նախարարներ Մեհմեթ Վեջդի Գյոնյուլի ու Սաբահաթթին Չաքմաքօղլուի, ինչպես նաև մի շարք բարձրաստիճան զինվորականների։
Գերմանացի իրավաբանները նրանց մեղադրում են 2003 թվականից սկսած՝ թուրք-քրդական հակամարտության ժամանակ ռազմական հանցագործություններ գործելու մեջ։
Գերմանացի փաստաբանները ներկայացնում են թուրքերի հետ դիմակայությունում զոհված քրդերի հարազատների շահերը։ Այդ հայցում բերված են քուրդ ապստամբների դեմ թուրքական կողմի իրականացրած ապօրինի հաշվեհարդարների, բանտարկյալների սպանությունների ու կտտանքների տասնյակ օրինակներ, ինչպես նաև քիմիական զենքի կիրառման դեպքեր։
Դրանցից մեկում նշված է, որ թուրքական ոստիկանությունը 2004 թվականի նոյեմբերի 21-ին գնդակահարել է 12-ամյա Ույֆուրին և նրա հորը, որոնք զենք չեն կրել, հետևաբար չէին կարող դիմադրություն ցույց տալ։ Այդ գնդակահարությանը ներկա են գտնվել Ույֆուրի կրտսեր եղբայրներն ու քույրերը։ Ոստիկանությունը հայտարարել էր, որ փնտրել է զինված հանցագործի։ Այդ միջադեպը լայն արձագանք էր գտել Թուրքիայում, սակայն ոստիկաններին արդարացրել էին՝ համարելով, որ նրանք ինքնապաշտպանության են դիմել։
Բացի այդ, գերմանացի փաստաբանները հիշեցնում են, որ 2009 թվականի սեպտեմբերի 8-15-ը՝ թուրք-քրդական բախման ժամանակ, թուրք զինվորականները քիմիական զենք են կիրառել քրդերի դեմ, ինչի արդյունքում զոհվել է 9 քուրդ ապստամբ։ Գերմանացի փաստաբանները պնդում են, որ դա ռազմական հանցագործություն է, քանի որ Թուրքիան հանդիսանում է 1997 թվականից գործող Քիմիական զենքի գործածումն արգելող կոնվենցիայի անդամ։
Նշվում է, որ գերմանական օրենքներով թույլատրվում է մեղադրանք հարուցել զինվորական հրամանատարների ու քաղաքական գործիչների դեմ՝ աշխարհի ցանկացած վայրում տեղի ունեցած միջազգային իրավունքի հրապարակավ խախտման համար։
Հիշեցնենք, որ քիմիական զենքի կիրառումն արգելված է 1899 թվականի Հաագայի կոնվենցիայով, որի 23-րդ հոդվածով արգելվում է այնպիսի զինամթերքի կիրառումը, որի միակ նշանակությունը հակառակորդի կենդանի ուժը թունավորելն է, ինչպես նաև 1925 թվականի Ժնևյան արձանագրությամբ ու 1993 թվականի՝ քիմիական զենքի մշակումը, արտադրությունը, կուտակումն ու կիրառումն արգելող Ժնևյան կոնվենցիայով:
Թուրքիան վերջինիս տակ իր ստորագրությունը դրել է 1993 թվականի հունվարի 14-ին: Քիմիական զենքն արգելող կազմակերպությանը (OPCW) անդամակցելու որոշումը Թուրքիայում վավերացվել է 1997 թվականի մայիսի 12-ին և ուժի մեջ մտել 1997 թվականի հունիսի 11-ին:
