«Հայհեղինակ» ՀԿ նախագահ Սուսաննա Ներսիսյանն այսօր անդրադարձավ Հայաստանում հեղինակային իրավունքի պաշտպանության խնդրին: Սուսաննա Ներսիսյանի խոսքերով` խնդրի լուծման հարցում թեև կան բացեր, բայց կա նաև առաջընթաց: «Սա ուղիղ կապով առնչվում է տնտեսության հետ, և այն երկրները, որտեղ մտավոր սեփականության խնդիրները ցածր մակարդակի վրա են, չեն կարող զարգացած երկիր համարվել»,- նշեց Սուսաննա Ներսիսյանը` հավելելով, որ մեր օրենսդրական դաշտը բավականին բարձր մակարդակի վրա է և անընդհատ կարգավորման փուլում է: Նա նշեց, որ մեր օրենսդրությունն արդեն երեք անգամ վերանայվել է, բայց այսօր նորից օրենքը վերանայելու խնդիր կա:
Սուսաննա Ներսիսյանը նշեց, որ հայ հեղինակները դիմել են իրենց հեղինակային իրավունքի պաշտպանության խնդրով, և չնայած կան դատեր, որոնք շահել են, սակայն դատական համակարգը Հայաստանում դեռ շատ աշխատանք ունի, քանի որ միշտ չէ, որ վճիռներն օբյեկտիվ են կայացվում: «Հայաստանը փորձում է դառնալ կիրթ երկիր․ եթե արվեստագետը պաշտպանված չէ, կլքի երկիրը»,- նկատեց բանախոսը:
Նա նաև նշեց, որ ինչքան ավելանում են օգտագործող կազմակերպությունները, այնքան խախտումները շատանում են. 90-ականներին քիչ էին խախտումները, քանի որ օգտագործման ձևերն էին տարբեր. «Տեռանովա», «Դեբենհեմ» և նման շատ խանութներ երաժշտություն են միացնում, այնինչ իրավատերերի կողմից չկա թույլտվություն, ինչը իրավունքի խախտում է, չկա լիցենզիոն պայմանագիր: ՀԿ նախագահը նշեց նաև եթերում ֆիլմերում, հաղորդումներում օգտագործվող երաժշտության, օբյեկտներում և ռեստորաններում հնչող երաժշտության մասին. «Բոլոր զարգացած երկրներում պետք է թույլտվություն լինի, բայց այսօր Հայաստանում այս առումով անելիքներ շատ կան: Գերմանիայում ամեն մեկը գիտի իր իրավունքների և պատասխանատվությունների մասին, ամեն ինչ․ սա լավագույն օրինակն է»,- նկատեց բանախոսը:
«Հայհեղինակ» ՀԿ-ն հայ հեղինակների կողմից գրագողության հետ կապված շատ դիմումներ է ստանում: «Ամեն դեպքում կա ակտիվություն, չի կարելի ասել, թե վիճակը ճահճային է, հեղինակը իր տեղում է, օգտագործող կազմակերպությունն իր տեղում է, արդեն դիմում են իրենց իրավունքների պաշտպանության համար»,- ավելացրեց Սուսաննա Ներսիսյանը: