Մեծ Բրիտանիան ռազմական գործողությունների ծրագիր է նախապատրաստում այն պարագայի համար, եթե ԱՄՆ-ը և նրա դաշնակիցները հրթիռային հարված հասցնեն Իրանի ուղղությամբ: Այս մասին գրում է բրիտանական The Guardian թերթը` վկայակոչելով Մեծ Բրիտանիայի կառավարության իր աղբյուրը:
ԱՄՆ-ը և նրա դաշնակիցները կարծում են, որ իրանական միջուկային ծրագրի նպատակը միջուկային զենք ստեղծելն է: Իրանը հայտարարում է, որ իր ատոմային ծրագիրը բացառապես խաղաղ նպատակներ ունի:
Guardian-ը հաղորդում է, որ մասնավորապես նախատեսվում է Իրանին մոտ ջրերում տեղակայել բրիտանական ռազմանավեր և ստորջրյա նավեր` զինված «Տոմահավկ» հրթիռներով: Նախատեսվում է նաև օգտագործել օդային ուժեր: Ցամաքային ներխուժում Իրան նախատեսված չէ, սակայն հատուկ ջոկատների օգտագործումը չի բացառվում:
Բրիտանիայի կառավարության աղբյուրը նշել է, որ ԱՄՆ նախագահ Բարաք Օբաման չէր ցանկանա որոշում կայացնել Իրանի դեմ ռազմական գործողություններ սկսելու վերաբերյալ նախքան նախագահական ընտրությունները, որ անցկացվելու են գալիք տարվա նոյեմբերին:
Սակայն, թերթը գրում է, որ հնարավոր է` նա ստիպված լինի փոխել իր որոշումը և դիմել ռազմական գործողությունների:
«Նախկինում կարծում էինք, որ նա կարող է սպասել մինչև հաջորդ տարվա ԱՄՆ նախագահական ընտրությունները, սակայն այժմ դրանում համոզված չենք,- ասել է աղբյուրը։- Առաջիկա ամիսներին նախագահ Օբաման պետք է կարևոր որոշում կայացնի, քանի որ նա չի ցանկանում, որպեսզի գործողությունները ձեռնարկվեն անմիջապես ընտրություններից առաջ»:
Նշենք, որ Իսրայելի վաչապետ Բենյամին Նեթանյահուն և պաշտպանության նախարար Էհուդ Բարաքը փորձում են համոզել կառավարության անդամներին պաշտպանել Իրանի միջուկային օբյեկտներին հարված հասցնելու ծրագիրը: Haaretz թերթի տվյալներով` նրանց արդեն հաջողվել է համոզել արտգործնախարար Ավիգդոր Լիբերմանին, որը նախկինում դեմ էր հանդես գալիս այդ ծրագրին: