Նախորդ շաբաթվա սպանությունների շարքից աչքի ընկավ որդու ձեռքով 61- ամյա հոր սպանությունը:
Մեզ հաջողվեց որոշ մանրամասներ ճշտել սպանության հետ կապված: Պարզվում է, որ ոչ միայն տղան է ներգրավված սպանության մեջ, այլև սպանվածի կինը: Բայց շատ հնարավոր է, որ սպանությունը բարդվի միայն տղայի վրա, և նա «գժի թղթով» պատասխանատվությունից խուսափի, քանի որ հոգատար հայրը որդու կողմից սպանվելուց 3 օր առաջ «գժի թղթով» նրան ազատել էր բանակից:
Հիշեցնենք, որ հոկտեմբերի 28-ին, ժամը 01.50-ին, ոստիկանության Մալաթիայի բաժնում հաղորդում էր ստացվել, որ «Հաղթանակ» կամրջի տակ ավտոմեքենա է այրվում: Դեպքի վայր մեկնած օպերատիվ խումբը «Հաղթանակ» կամրջի տակ` Թաիրով փողոցի աջակողմյան հատվածի ոչ երթևեկելի մասում, հայտնաբերել էր «ՎԱԶ-2105, մակնիշի կարմիր գույնի այրվող ավտոմեքենա: Նույն օրը, ժամը 02.05-ին, հրդեհը մարելուց հետո, ավտոմեքենայի կիսաայրված սրահի հետևի նստելատեղին` պոլիէթիլենային տոպրակներով, սրբիչով, ծածկոցով և կպչուն ժապավենով փաթաթված վիճակում, հայտնաբերվել էր Երևան քաղաքի բնակիչ, 61-ամյա Վրեժ Գրիգորյանի դիակը` գլխի մասում կտրած-ծակած բազմաթիվ վնասվածքների հետքերով: Ոստիկանության ծառայողների ձեռնարկած օպերատիվ-հետախուզական և քննչական միջոցառումների շնորհիվ նույն օրը, ժամը 17.10-ին, սպանություն կատարելու կասկածանքով բերման է ենթարկվել Վրեժ Գրիգորյանի որդին` 23-ամյա Սիփան Գրիգորյանը: Վերջինս խոստովանել է, որ հոկտեմբերի 27-ին, ժամը 14.00-ին, տան հյուրասենյակում, կենցաղային հարցերի շուրջ ծագած վիճաբանության ժամանակ, տանը եղած կացնով հարվածներ է հասցրել հոր գլխին, որը ստացած վնասվածքներից տեղում մահացել է: Այնուհետև հանցագործության հետքերը թաքցնելու նպատակով տղան իր դաժանություններին այլ երանգներ է հաղորդել: Հոկտեմբերի 28-ին, ժամը 01.00-ին Սիփան Գրիգորյանը հոր դին տեղավորել է վերջինիս պատկանող «ՎԱԶ-2105» մակնիշի ավտոմեքենայի սրահի հետևի նստելատեղին, մեքենան տեղափոխել «Հաղթանակ» կամրջի տակ` Թաիրով փողոցի աջակողմյան հատվածի ոչ երթևեկելի մաս և հրկիզել այն:
«Առաջին լրատվական»-ը հարևանների շրջանում անցկացրած հացումներից պարզեց, որ Վրեժ Գրիգորյանը դեպքից 3 օր առաջ «գժի թղթով, որդուն ազատել է բանակից: Չի բացառվում, որ հայրասպանը անմեղսունակ ճանաչվի ու ազատվի պատժի կրումից: Չնայած հենց նույն հարևանները ասում էին, որ մինչ այդ Սիփանի կողմից գժին բնորոշ վարք չեն նկատել:
Տեղեկություններ կան, որ որդին պատրաստվել է ամուսնանալ, և դրա հետ կապված` դեպքի օրը հայրը նպատակ է ունեցել ոսկեղեն գնել: Կասկածի տեղիք է տալիս գումարի հայտնվելը հոր ձեռքին, քանի որ մինչ այդ գումարային խնդիր է ունեցել. ավտոդպրոցների փակումից հետո նա զրկվել է գումարի աղբյուրից, քանի որ փակվել էր նաև Շենգավիթում գտնվող նրա ավտոդպրոցը: Եվ կասկած կա, որ նա վաճառել էր մոտ 2000 քմ տարածքը:
Մեզ հաջողվեց նաև պարզել, որ սպանության գործում ներգրավված է եղել նաև սպանվածի կինը, որը ոստիկանության 6-րդ վարչության աշխատակից է: Ենթադրվում է, որ մոր հորդորներով է գործը հասել սպանության, քանի որ հայրը շատ լավ է եղել տղաների հետ, ապահովել է ամեն ինչով և նույնիսկ ազատել է տղային բանակից: Իսկ մորը բնորոշելիս գրեթե ոչ ոք զերծ չէր մնում «հիստերիկ» բառն օգտագործելուց: Սիփանը սովորել է Երևանի թատրոնի և կինոյի պետական ինստիտուտի կինոօպերատորական բաժնում: Կուրսեցիների և դասախոսների պատմելով` սովորել է շատ լավ: Նրան բնորոշեցին որպես շատ լավ, բարի, հանգիստ, ֆիզիկապես ուժեղ մարդու, որը ոչ ոքի երբեք չի ասել աչքիդ վերևը հոնք կա: Հետևաբար ոչ ոք չէր հավատում, որ կարող է մարդ սպանել, այն էլ` հորը: Սիփանի եղբայրը ծառայում է բանակում, սակայն նրան էլ են ձերբակալել և ավելի ուշ ազատ արձակել: Մեզ հետ զրույցում թե՛ հարևանները, թե՛ Սիփանի համակուրսեցիները պատմում էին, որ իրենք էլ չեն կարողանում հասկանալ, թե որը կարող էր լինել սպանության դրդապատճառը: Միաժամանակ նկատում են, որ ամուսինները ամուսնալուծված են եղել 20-25 տարի առաջ, իսկ Վրեժ Գրիգորյանը վարորդական վկայականների ստվերային գործունեություն է ծավալել: Այսինքն` գումարից չի նեղվել, տղաներին ապահովել է «Յագուար» մենքենաներով, բոլորին օգնել է: Հետևաբար, միակ վարկածը, որը ծնվում է հարևանների մտքում, այն է, որ սպանության պատճառը կարող էր լինել ունեցվածքը կիսելու անհամաձայնությունը՝ կնոջ և ամուսնու միջև: Ավելին՝ սպանվածին հուղարկավորելը ևս մեծ խնդիր է դարձել, քանի որ նրա պահած գումարները չեն կարողանում գտնել, որ հուղարկավորությունը կազմակերպեն, հետևաբար այդ ամենը կազմակերպվում է նրա հեռու ու մոտ ծանոթների միջոցով:
Ոստիկանությունից ևս փորձեցինք ճշտել, թե որքանով է իրականությանը համապատասխանում որդու «գժի թուղթ» ունենալու այս վարկածը, սակայն մեզ պատասխանեցին, որ ներկա պահին ոչինչ ասել չեն կարող: Ոստիկանության Մալաթիայի քննչական բաժանմունքում քննություն է ընթանում, և պաշտոնական վարկածի կամ վարկածների մասին հնարավոր կլինի տեղեկացնել ավելի ուշ:
Լուսանկարը` Գագիկ Շամշյանի
