Ռուսական ԶԼՄ-ների ներկայացուցիչների հետ հանդիպման ժամանակ Հայաստանի վարչապետ Տիգրան Սարգսյանը հայտարարել է, որ 2009թ. Ռուսաստանից ստացված $ 500 մլն վարկը ընդհանուր առմամբ օգտագործվել է: Դրանից մոտ $220 մլն-ն ուղղվել է բնակարանաշինությանը Սպիտակի շրջանում: Վարկի մյուս կեսը բանկերի միջոցով տրամադրվել է արտահանում իրականացնող, տուրիզմի ոլորտում ներգրավված, մանր և միջին բիզնեսով զբաղվող ընկերություններին: Վարկի այս մասը ($235 մլն) ընկերությունները կվերադարձնեն: Մնացյալ գումարը փոխանցվել է կայունացման հիմնադրամ:
«Ռուսական վարկը թույլ է տվել միջոցներ տրամադրել տնտեսության հիմնական ոլորտներին` շինարարություն, պետական բյուջե, և դրանով մեղմացնել ֆինանսական ճգնաժամի բացասական հետեւանքները»,- նշել է Սարգսյանը` ավելացնելով, որ Հայաստանի արտաքին պարտքը ՀՆԱ-ի համեմատ չի գերազանցում 40%-ը, ինչը թույլատրելի է միջազգային ֆինանսական աշխարհում: