Իրանի հոգևոր առաջնորդ այաթոլլա Ալի Խամենեին նոյեմբերի 2-ին հայտարարել է, որ ինքն ունի «100 անհերքելի փաստաթուղթ», որոնք ապացուցում են, որ ԱՄՆ-ը ահաբեկչություններ է կազմակերպել Իսլամական Հանրապետությունում և ամբողջ Մերձավոր Արևելքում: Այս մասին հաղորդում է Reuters գործակալությունը:
«Այդ փաստաթղթերի հրապարակումը կխայտառակի Ամերիկային ամբողջ աշխարհի առաջ»,- խոստացել է Խամենեին 1979 թ. ԱՄՆ դեսպանատան գրավման հերթական տարելիցը նշող իր համախոհներին:
Թե դրանք ինչ փաստաթղթեր են, որն է դրանց աղբյուրը և ինչ իրադարձությունների մասին է խոսքը, այաթոլլան չի մեկնաբանել: Դրա փոխարեն նա նշել է, որ «Ամերիկան չի դադարեցնում Իրանի վրա ճնշում գործադրելու իր փորձերը` ահաբեկչության մեջ անհեթեթ մեղադրանքներով փորձելով փրկվել «Գրավեք Ուոլ Սթրիթը» շարժումից»:
Ավելի վաղ հաղորդվում էր, որ ԱՄՆ-ը Իրանին մեղադրում է Վաշինգտոնում Սաուդյան Արաբիայի դեսպանի դեմ դավադրություն կազմակերպելու մեջ:
