Ֆինանսների նախարարությունը տեղեկացրել է, որ 2011թ. բյուջեի նախագծի վերաբերյալ ԱԺ-ից ստացված 616 առաջարկություներից 212-ը իրենք ընդունել են: Սակայն պարզվում է, որ իրականում ո՛չ այդքան առաջարկ է եղել, ո՛չ էլ այդքան ընդունված առաջարկ, քանի որ կոալիցոն պատգամավորները առաջարկել են անել այնպիսի ծախսեր, որոնք որ ի սկզբանե կառավարությունը նախատեսել է իրականացնել: Այս մասին «Առաջին լրատվականի» հետ զրույցում ասաց ԱԺ պատգամավոր Անահիտ Բախշյանը: «Օրինակ` կոալիցիոն պատգամավորները առաջարկել են 107 դպրոցի վերանորոգման առաջարկ, բյուջեով էլ նախատեված է 135 դպրոցներ: Սրանցից 43-ը միայն չեն կրկնվում, մնացածը կրկնվում են: Կոալիցիոն կառավարությունը փաստորեն իմիտացիա է անում իր քաղաքական ուժերի առաջարկությունների հիման վրա: Որովհետև այն դպրոցը, որ կառավարությունը նախատեսել էր բյուջեով, կոալիցոն երեք կուսակցություններն էլ չգիտես ինչու նորից առաջարկել են այդ դպրոցները վերանորոգել»,- նշեց Ա. Բախշյանը` հավելելով. «Այս ամենը հաշվի անելուց հետո ստացվում է, որ կոալիցիոն կուսակցությունների կողմից ներկայացված և ընդունված առաջարկները 122-ն են, որից 92-ը, սակայն, բյուջեով արդեն իսկ նախատեսված էին: Այսինքն` ընդամենը 30 նոր առաջարկ է եղել, որն ընդունվել է»: