ՀՅԴ Գերագույն մարմնի անդամ Արմեն Ռուստամյանը, Երևանի քաղաքապետի հրաժարականին վերաբերող «Առաջին լրատվական»-ի հարցին ի պատասխան, ասաց. «Իշխանական ճամբարներում նկատվում են այլ երևույթներ. արդարադատության նախարարը ևս հրաժարական տվեց: Այս ամենը խոսում է այն մասին, որ, եթե չկա ժամանակակից, ժողովրդավարական մեթոդներով ձևավորված իշխանական համակարգ, ապա «սուրբ տեղը» թափուր չի մնում, և գերիշխող են դառնում կենցաղային, կիսագողական հարաբերությունները: Ես կողմ եմ, երբ լինում են պաշտոնյայի գործունեությունը կարգավորող հակակշռման և զսպման մեխանիզմներ: Եթե շահերի բախումը տեղափոխվում է միջանձնական հարաբերությունների ոլորտ, ապա, բնականաբար, այսպիսի ավարտ է ունենում»: Նա Գագիկ Բեգլարյանի հրաժարականը համարում է ոչ թե քաղաքական դեմարշ, այլ սկանդալային միջադեպի հետևանք, որը հասավ մինչև ՀՀ նախագահի դուռը: Իսկ դա, ըստ ՀՅԴ ԳՄ անդամի, խայտառակություն է երկրի համար: Արմեն Ռուստամյանին հիշեցրինք, որ Հայ Յեղափոխական Դաշնակցությունը չի ընդվզել ինչպես 2008 թ. ՀՀ նախագահի կեղծված ընտրություններից հետո, այնպես էլ մեկ տարի առաջ Երևանի ավագանու կեղծված ընտրություններից հետո, որոնց արդյունքում Երևանի քաղաքապետ դարձավ Գագիկ Բեգլարյանը: «Մենք միշտ էլ հայտարարություններ ենք արել և նշել ընտրությունների բացերն ու թերությունները»,- արձագանքեց ՀՅԴ ԳՄ անդամը: «Առաջին լրատվականը» հարցրեց՝ տեսնու՞մ է արդյոք Արմեն Ռուստամյանը արտահերթ ընտրությունների հեռանկար: ՀՅԴ ԳՄ անդամը չի տեսնում ինչպես ՀՀ նախագահի, այնպես էլ ԱԺ-ի արտահերթ ընտրությունների հեռանկար: Արմեն Ռուստամյանից հետաքրքրվեցինք նաև, թե այսօր Հայաստանում կա՞ բավարար ներուժ` հակազդելու իշխանությունների գործունեությանը: Մեր զրուցակցի դիտարկմամբ` ժողովուրդը պոռթկում է ապրում միայն ընտրությունից ընտրություն: