Ինչպես գրում է «Էխո-Մոսկվի» ռադիոյի կայքը, որը հղում է անում իսպանական El País թերթին, անցած տարի Ռուսաստանի կառավարության պաշտոնյաները խոստովանել են ամերիկյան պատվիրակությանը, որ Վենեսուելային, որը, ըստ Վաշինգտոնի, տարածաշրջանում անկայունության հիմնական աղբյուրն է, վաճառել են 100 կառավարվող զենիթային հրթիռ: Թերթը գրում է, որ «Վենեսուելայի վերազինումը և նրա մեծացող համագործակցությունը Ռուսաստանի հետ ինչ-որ պահի սկսել է անհանգստացնել Վաշինգտոնին։ ԱՄՆ-ն կոչ է անում թե՛ իր դաշնակիցներին և թե՛ Ռուսաստանին զենք չվաճառել Կարակասին: Հիմնական մտահոգությունն այն է, որ այդ զենքերը հետագայում կարող են հայտնվել FARC-ի (կոլումբիական անջատողական կազմակերպության) ձեռքում: Սակայն այն փաստաթղթերում, որոնք հրապարակվել են WikiLeaks-ի կողմից, կան ռուսական կողմին ուղղված՝ «Իգլա» տեսակի 100 հրթիռ վաճառելու կոնկրետ մեղադրանքներ։ Դրան ակտիվ մասնակցել է Պուտինի ամենավստահելի դեմքերից մեկը` փոխնախագահ Իգոր Սեչինը»,- գրում է թերթի լրագրող Խորխե Մարիռոդրիգան:
Վաշինգտոնի կողմից դիտարկվող հիմնական սցենարներից մեկն այն է, որ այդ զենքը հայտնվել է FARC-ի մոտ: Այդ զենքը Վաշինգտոնը համարում է «հակահրթիռային համակարգի համար մահաբեր զենքերից մեկը», որ կարող է հեշտ թիրախ դարձնել ամերիկյան Blackhawk ուղղաթիռները:
FARC-ի մի գրոհայինից առգրավված համակարգիչներից մեկում հայտնաբերվել են վենեսուելական զինվորականներից մեկին` Լուսիանո Առանգոյին ուղղված նամակը. վերջինիս առաջարկ էր արվում կոլումբիացի գրոհայիններին վաճառել այդ զենքից:
Ամերիկացիները խնդրել են Ռուսաստանին, որպեսզի այդ հրթիռների կիրառման համար պարտադիր լինեն բեռնատար մեքենան կամ ամրացված հարթակը։ Սրան ռուսական կողմը պատասխանել է, որ հենց Չավեսի խնդրանքով է, որ իրենք Վենեսուելային վաճառում են անհատական և շարժական: Ըստ թերթի՝ այս զենքի վաճառքից հետո ամերիկացիները երկու անգամ պետք է մտածեն նախքան Վենեսուելայի կողմը ինքնաթիռներ ուղարկելը, քանի որ զենքի այդ մոդիֆիկացիան շատ արդյունավետ է ռազմական օդանավերի հետ պայքարում:
