Այսօր կառավարության շենքի դիմաց հավաքված՝ զոհված զինվորների մայրերն իրենց բողոքի ձայնն էին բարձրացրել՝ պահանջելով պատժել մեղավորներին. «Մենք մեր որդիներին հայոց բանակ ենք ուղարկում, որպեսզի մեր սահմանները միշտ պաշտպանված լինեն, իսկ փոխարենը բանակը մեզ վերադարձնում է մեր որդիների դիակները։ Ո՞վ պետք է պատժվի, ո՞վ պետք է պատասխան տա»:
«Ես 2001 թ.Վայքում սպանված զինվոր Արայիկ Ավետիսյանի մայրն եմ, պահանջում եմ, որ իմ որդուն սպանողը պատժվի: 9 տարի է՝ նախաքննական մարմինը չի ցանկանում մարդասպանին հանձնել իրավապահ մարմիններին»,- նշում է զոհվածի մայրը:
Ըստ պաշտոնական վարկածի` Արայիկ Ավետիսյանը, հերթական «օտպուսկից» հետո վերադառնալով զորամաս, գումարտակի շտաբի պետի սենյակում սպանվել է նույն զորամասի զինվորներից մեկի կողմից` գումարտակի հրամանատարին ամրակցված ատրճանակով:
«Դատախազությունը գործն ուղարկեց Մալաթիա-Սեբաստիա քրեակատարողական հիմնարկ, որտեղ ականատես վկան իր ցուցմունքի մեջ նշել էր, որ սպանությունը կատարել է գումարտակի հրամանատարը` պահանջված 100 դոլարը չտանելու համար: Իսկապես, տղաս ինձ ասել էր, որ 100 դոլար պետք է տանի զորամաս և 2 լ տնական օղի: Ես օղին կարողացա ուղարկել, իսկ պահանջվող գումարը`ոչ»,- ասաց Անահիտ Մկրտչյանը՝ ավելացնելով, որ այս 9 տարիների ընթացքում ոչ ոք չի պատժվել:
Զոհված զինվորների մյուս մայրերը նույնպես պահանջում էին, որ իրենց որդիներին սպանողները պատժվեն օրենքի ողջ խստությամբ, և որ բանակում կարգ ու կանոն հաստատվի, ու վերջ տրվի այս մարդասպանություններին:
