Կենտրոնական բանկը բյուջեի եկամուտներից ոչ մի դրամ չի ծախսել: Այսօր Ազգային ժողովում նման հավաստիացում արեց ԿԲ նախագահ Արթուր Ջավադյանը՝ անդրադառնալով վերջերս մամուլում շրջանառվող տեղեկատվությանը, թե ԿԲ-ն իր ծախսերն ու կապիտալ ներդրումներն անում է պետբյուջեի հաշվին: Նրա խոսքով՝ ԿԲ-ն վճարել է տոկոսադրույքները. 2009 թ.՝ 10 մլրդ դրամ, 2010 թ.՝ 13 մլրդ դրամ, այս տարվա 9 ամսվա կտրվածքով՝ մոտ 4 մլրդ դրամ:
«Կենտրոնական բանկն այս պահին աշխատում է շահույթով: Թե տարին ինչ շահույթով կփակենք՝ դժվար է ասել, բայց այս պահին մեր շահույթը 20 մլրդ դրամ է»,- ասաց Ա. Ջավադյանը՝ հավելելով, որ ԿԲ շահույթը կախված է դրամի փոխարժեքից, և որքան դրամն արժեզրկվի, այնքան ԿԲ շահույթը մեծ կլինի:
Նրա ներկայացմամբ՝ ԿԲ վարչական ծախսերը 5 մլրդ դրամ են, աշխատավարձերը՝ 4 մլրդ 3 մլն, որը նախորդ տարվա համեմատ աճել է 9%-ով, ինչը պայմանավորված է ԿԲ աշխատակիցների թվի ավելացմամբ: ԿԲ ներկայացուցչական ծախսերը 54 մլն դրամ են, ծառայողական փոխադրամիջոցների համար այս տարի ծախսվելու է 8 %-ով ավելի, քան նախորդ տարի, քանի որ պետք է ձեռք բերվեն ավտոբուս և միկրոավտոբուս:
Ա. Ջավադյանը հատուկ ուշադրություն հրավիրեց այն հանգամանքի վրա, որ, ըստ կարգի, ԿԲ խորհրդի անդամների ծառայողական մեքենաները պետք է 5 տարին մեկ թարմացվեն, իսկ հաջորդ տարի արդեն կլրանա դրանց շահագործման 8 տարին, մինչդեռ ԿԲ-ն, անսալով կառավարության հորդորներին, 2012-ի պետբյուջեով պահանջ չի ներկայացրել նոր ավտոմեքենաների համար:
ԿԲ վարչական շենքերի կառուցման համար նախատեսված է 25 մլրդ դրամ, ԿԲ աշխատակիցների ժամանակավոր կացարանների համար, իսկ Սիսիանում՝ ԿԲ կենտրոնի կառուցման համար հատկացվելու է 115 մլն դրամ: Ա. Ջավադյանը նշեց, որ ընթացքում են Դիլիջանում «Գիտելիք՝ հանուն զարգացման» ԿԲ ուսումնական կենտրոնի կառուցման աշխատանքները:
