Հավաքական անվտանգության պայմանագրի կազմակերպության անդամ երկրների պաշտպանության, արտաքին գործերի նախարարների և անվտանգության խորհուրդների ղեկավարների համատեղ նիստից հետո Ռուսաստանի արտաքին գործերի նախարար Սերգեյ Լավրովը հայտարարել է, որ որոշում է կայացվել ՀԱՊԿ խաղաղապահ ուժերի ստեղծման մասին, և որոշ մանրամասներ է ներկայացրել այդ ուժերի գործունեության վերաբերյալ: Նա ասել է, որ նախարարների և անվտանգության խորհուրհրդների ղեկավարների ընդհանուր խորհրդում ընդունված փաստաթղթերը ներկայացվելու են ՀԱՊԿ անդամ երկրների ղեկավարների ստորագրմանը:
«Մենք համաձայնեցրել ենք բոլոր խնդիրներն անխտիր: Առաջնային էր հենց այն փաստաթղթերի փաթեթը, որոնց մասին հանձնարարականները տրվել էին Երևանում կայացած ՀԱՊԿ անդամ երկրների ղեկավարների ոչ պաշտոնական հանդիպման ժամանակ»,- ասել է Լավրովը: Այս մասին տեղեկացնում է РИА-Новости գործակալությունը:
«Ընդունված է հռչակագրի նախագիծը, որը վերաբերում է մեր համագործակցությանը միջազգային ասպարեզում: Սա անմիջական ներդրում է միջազգային համակարգման ուղղությամբ մեր կազմակերպության աշխատանքների գործում: Երրորդ փաստաթուղթը կապված է խաղաղապահ ուժերի հետ, որում ֆիքսվել են ինչպես խաղաղապահ առաքելություն իրականացնելու, այնպես էլ ՄԱԿ Անվտանգության խորհրդի որոշմամբ իրականացվող խաղաղապահ առաքելություններին խաղաղապահ զորքեր տրամադրելու՝ ՀԱՊԿ անդամ երկրների պատրաստակամությունը»,- ավելացրել է Լավրովը:
Լավրովը նաև ասել է, որ վաղը տեղի կունենա ԱՊՀ անդամ երկրների հավաքը Մոսկվայում, որտեղ կքննարկվեն մինչև 2020 թ. երիտասարդական համագործակցության ռազմավարությունը, ԱՊՀ-ի և Եվրասիական տնտեսական համագործակցության կազմակերպության միջև համագործակցության պայմանագրում փոփոխություններ կատարելու, որով ԱՊՀ տնտեսական դատարանը կկատարի նաև այդ կազմակերպության տնտեսական դատարանի գործառույթները, ԱՊՀ ռազմական համագործակցության հայեցակարգերը մինչև 2015 թ. և այլն: