Հոկտեմբերի 31-ին Մայր աթոռ սուրբ Էջմիածնում Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունել է ՀՀ-ում ԱՄՆ նորանշանակ դեսպան Ջոն Ա. Հեֆերնին:
Վեհափառ հայրապետը, ողջունելով դեսպանին և իր բարեմաղթանքները բերելով նրա առաքելությանը, անդրադարձել է երկու երկրների միջև առկա ջերմ և սերտ հարաբերություններին:
Նա ի դեմս դեսպանի շնորհակալություն է հայտնել ԱՄՆ-ի իշխանություններին` տարածաշրջանում առկա խնդիրների լուծմանն ուղղված ջանքերի և մասնավորապես հայ ժողովրդի հանդեպ մշտապես ցուցաբերվող աջակցության և զորակցության համար:
Հանդիպմանն անդրադարձ է կատարվել Մինսկի խմբի համանախագահների և խմբի համանախագահող երկրների նախագահների կարևոր դերակատարությանը Լեռնային Ղարաբաղի հակամարտության խաղաղ կարգավորման և տարածաշրջանում խաղաղության հաստատման գործում:
Գարեգին 2-րդն անդրադարձել է նաև տարածաշրջանի հոգևոր առաջնորդների գործադրած ջանքերին` ի խնդիր տարածաշրջանում խաղաղության և համերաշխության մթնոլորտի ձևավորման:
Զրույցի ընթացքում դեսպանին են ներկայացվել Հայ առաքելական եկեղեցու գործունեությունը կյանքի տարբեր ոլորտներում և եկեղեցու առջև ծառացած զանազան մարտահրավերներ:
Իր հերթին, նորանշանակ դեսպանն ուրախություն է հայտնել Մայր աթոռում լինելու կապակցությամբ և շնորհավորել կաթողիկոսին ծննդյան 60-ամյակի և գահակալության 12-րդ տարեդարձի առիթով:
Հանդիպմանը ներկա են եղել ԱՄՆ Հայոց արևելյան թեմի առաջնորդ Տ. Խաժակ արքեպիսկոպոս Պարսամյանը, ԱՄՆ Հայոց արևմտյան թեմի առաջնորդ Տ. Հովնան արքեպիսկոպոս Տերտերյանը և ԱՄՆ Հայոց արևելյան թեմի միջեկեղեցական հարաբերությունների պատասխանատու Տ. Վիգեն արքեպիսկոպոս Այքազյանը:
